Lockdown sa Sitio Zapatera gilibkas na

CEBU, Philippines — Untop alas 12 sa udto kagahapon hingpit na nga gilibkas ang gipatumang lockdown sa Sitio Zapatera, Barrio Luz, Dakbayan sa Sugbo.

Ang maong lugar ang unang nakatala og daghang kaso sa coronavirus disease 2019 diin kasagaran mga asymptomatic o walay sintomas ug gidala sa Barangay Isolation Centers aron maatiman sa mga tinugyanan sa City Health Department.

Niadtong Martes 51 ka nagpositibo kaniadto ang nakagawas na sa BIC ug nakauli na sa ilang tagsa-tagsa ka panimalay human nag-negatibo na sa Covid-19.

Si Atty. Rey Gealon, tigpamaba ni Mayor Edgardo Labella, niingon nga ang Sitio Zapatera usa ka ehemplo nga lugar diin ang mga tawo sa dapit nitabang aron maayo sila nga niresulta nga daghan ang naka-recover.

Tungod niini, si Labella niluwat og memorandum nga nagmando sa Philippine National Police, Cebu City Health Department ug Cebu City Disaster Risk Reduction and Management Office sa paglibkas na sa lockdown sa Sitio Zapatera.

Giklaro ni Gealon nga nikooperar ang mga residente sa Sitio Zapatera sa gipatumang lockdown sama sa pagsunod sa social distancing, pagsul-ob og facemask ug nagpakabana ug nipatuo sa doktor ug nagpapiskay sa lawas maong daghan ang naka-recover ug gamay nalang ang nagpabilin nga Covid-19 positive sa lugar.

Disinfected na sab ang lugar aron luwas nga makabalik sa ilang pinuy-anan ang mga pasyente gikan sa BIC.

Ang Barangay Luz nipasar og resolusyon nga naghangyo sa paglibkas sa lockdown sa Sitio Zapatera nunot sa rekomendasyon sa Barangay Crisis Management Team ug Barangay Health Emergency Response Team.

Apan bisan sa paglibkas sa lockdown sa Sitio Zapatera, padayon gihapon ang kapolisan sa hugot nga pagbantay sa maong lugar.

Matud ni Police Regional Office 7 director, Police Brigadier General Albert Ignatius Ferro, nga bisan ubay-ubay na ang naka-recover sa maong sakit dili gihapon angayan mokompiyansa ang katawhan ilabi na kay dili tanan sa lugar ang nakuhaan og test.

Pabilin gihapon ang seguridad sa barangay kay pabilin pa man nga ubos sa Enhanced Community Quarantine ang Siyudad sa Sugbo. Rowena D. Capistrano/GMR (BANATNEWS)