Vendors sa Mandaue ipaubos sa rapid test
CEBU, Philippines — Gitinguha sa konseho sa Dakbayan sa Mandaue nga mapaubos sa rapid test sa coronavirus disease ang tanang manindahay sa dakbayan.
Ang maong tinguha ilang gihimo pinaagi sa giaprobahan nga resolusyon nga nag-awhag sa City Health Office sa pagpahigayon og rapid test sa tanang vendors sa dakbayan.
Si Konsehal Nerissa Soon-Ruiz nga maoy chairman sa committee on health sa konseho sa dakbayan maoy niduso sa resolusyon nga giaprobahan sa regular session niadtong Mayo 18, 2020.
Si Soon-Ruiz sa iyang resolusyon nipasabot sa kamahinungdanon sa pagpaubos sa rapid test sa Covid-19 sa tanang vendors sa dakbayan sanglit usa sa ilang kauban nga taga Asinan, Barangay Mantuyong ang namatay sa maong balatian niadtong Mayo 3, 2020.
Gitataw ni Soon-Ruiz sa iyang resolusyon ang kamahinungdanon sa rapid test sa Covid-19 sanglit expose ang mga vendors sa ilang kustomer sa ilang pagpamaligya sulod sa unom ka adlaw sa matag semana. /GMR (BANATNEWS)
- Latest
