PROBE: Adunay proseso batok sa nakalapas sa ECQ
CEBU, Philippines — Gihimakak sa Prevention Restoration Order Beautification Enhancement (PROBE) Team ang pasangil sa Commission on Human Rights (CHR)-7 nga giingong nakalapas sa tawhanong katungod ang pagpasayaw, pagpa-ampo ug pagpa-exercise sa ilang mga nadakop nga nakalapas sa gipatuman nga enhanced community quarantine (ECQ).
Ang CHR-7 nipahinumdum nga ang pagpahamtang og silot walay labot sa ilang trabaho.
Ang pangulo sa PROBE Raquel Arce niklaro nga ang gihimo nila ngadto sa mga nakalapas sa ECQ diha sa Plaza Indepencia gawas nga exercise kini disiplina usab kini kanila.
Matud ni Arce nga aduna silay gisunod nga proseso sama sa pagpaubos sa seminar ug pakig-estorya sa mga nakahimo og kalapasan.
Giklaro ni Arce nga girespeto nila kadtong mga lain og tinuohan nga nasakpan nga nakalapas sa ECQ diin hangyuon nila kining mag-ampo sa kaugalingon nilang pamaagi.
Susama lang ang intensiyon sa pag-ampo nga mao nga unta mahuman na kining krisis nga gisagubang karon ug hatagan og himsog nga panlawas ang mga frontliner nga nakigbatok virus.
Kagahapon adunay mga nakalapas usab sa ECQ diin gipaubos kini sa seminar, gipa -exercise ug gipasayaw.
Kasagaran sa maong mga nakalapas walay face mask ug ECQ pass samtang ang adunay ECQ pass ang naninda diin gidili kini.
Gibutyag ni Arce nga nakapasaka na sila og kasong disobedience batok sa lima ka tawo nga nakahimo na sa ikaduhang kalapasan. /BDB (BANATNEWS)
- Latest
