Krimen sa Cebu City nikunhod ngadto sa 70 porsyento

CEBU, Philippines — Nikunhod ngadto sa 70 porseyento ang krimen nga natala sa Cebu City Police Office (CCPO) sukad sa pagpatuman sa enhanced community quarantine (ECQ) sa Dakbayan sa Sugbo.

Kini ang gibutyag sa direktor sa CCPO Police Colonel Josefino Ligan diin niadtong Marso 17 hangtud sa Mayo 19, 2020 nakatala lang sila og 125 ka insidente.

Matud ni Ligan nga ang pagkunhod sa krimen sa Dakbayan sa Sugbo sa panahon sa pakigbatok sa covid-19 dako usab ang pagkunhod sa krimen sama sa pagpanagit sa mga motorsiklo diin 93.3 porsyento ang pagkunhod sa insidente, robbery nga adunay 88 persyento ug gikan sa 53 ka kaso sa tulis niadtong Enero hangtud sa Marso niining tuiga karon unom na lang ka insidente.

Ang mga kaso sa pagpangawat nikunhod usab kini ngadto sa 76 porsyento diin karon adunay 48 ka kaso nga natala itandi sa buwan sa Enero hangtud sa Marso nga adunay 200 ka kaso.

Ang kapolisan sa CCPO padayon usab kini sa pagpanakop sa mga makalapas sa mga ordinansa sa Siyudad sa Sugbo sa pagpatuman sa enhanced community quarantine.

Base sa talaan sa CCPO nikabat ngadto sa 2,259 ka tawo ang nadakpan diin 1,644 niini ang napasakaan og kaso ngadto sa korte ug 622 ang gipang-inquest sa piskaliya nikabat usab ngadto sa 622 ka tawo ang nakalapas sa disobedience ug ECQ.

Nikabat ngdato sa 3,853 ka tawo gipahimangnoan sa kapolisan tungod kay wala kini magsul-ob og facemask ug 401  ka tawo ang gipabayad og multa. /BDB (BANATNEWS)