Mga residente sa Alaska Mambaling naglaom sa ayuda

CEBU, Philippines — Ang pipila ka mga residente sa Alaska Mambaling, Dakbayan sa Sugbo ang naglaom nga mahatagan na sila sa ilang ayuda sa gobiyerno ubos sa Social Amelioration Program.

Ang mga residente sa maong lugar naglaom kini nga mopasabot kanila si Kapitan Gines Abellana sa tukma nga mga pamaagi kalabotan sa pag-apod-apod sa hinabang.

Ang Banat News nisuway sa pagtawag kang Abellana aron makuhaan sa iyang habig apan dili kini ma-contact.

Ang mga residente malaumon nga mahatag na ang ilang ayuda aron aduna silay magamit sa pagpamalit sa ilang konsumo.

Sa laing bahin, mga langyaw nga nagpuyo sa Dakbayan sa Sugbo nga gitawag og  Cebu Expats niapod-apod og food packs ngadto sa mga labing nanginahanglan niining panahon sa covid-19 pandemic. Nikabat ngadto sa 180 ka pamilya ang nahatagan og hinabang sa maong grupo diin matag usa ka pamilya adunay nadawat nga bugas, delata ug uban pa.

Ang Cebu Expats nihatag og ayuda ngadto sa pipila ka pamilya sa Barangay Pardo, Mambaling, Gaudalupe, Kamputhaw ug aduna usab ngadto sa simbahan ug mao na kini ang nipaambit ngadto sa mga pamilya nga nagkinahanglan.

Matud ni Phillip Yieh nga nagtampohay sila aron makapaambit og food packs ngadto sa pipila ka mga pamilya.

Samtang ang Archdiocese of Cebu uban sa Cebu Caritas Inc. ug Commission on the Laity nihatud og 89 ka kilo nga isda ngadto sa Cebu City Jail male dormitory gikan sa Bureau of Fisheries and Aquatic Resources (BFAR)- 7.

Si Padre Alex Cola, chairman sa CCI nagkanayon nga uban sa Kusina ni Martha nag-feeding usab sila ngadto sa 150 ka pamilya nga nagpuyo sa kadalanan ug nanghatag usab sila og 150 ka food packs ug 1,200 ka vitamins diha as San Roque gym. /BDB (BANATNEWS)