GCQ sa probinsiya gipangandaman sa kapolisan

CEBU, Philippines — Gipangandaman sa kapolisan ang pagpatuman sa protocol sa General Community Quarantine (GCQ) sa Probinsiya sa Sugbo nga gikatakda nga ipatuman karong tungang gabii.

Human sa kapin duha ka buwan nga gipatuman ang Enhanced Community Quarantine (ECQ) sa probinsiya, nakahukom sa Gob. Gwendolyn Garcia nga ipaubos na ngadto sa GCQ ang probinsiya bisan pa man nga adunay mga lungsod ang padayon gihapon ang pagsaka sa kaso sa nataptanan sa novel coronavirus (Covid-19).

Gikatakda nga pirmahan ni Garcia ang executive order alang sa GCQ karong adlawa.

Matud ni Cebu Provincial Police Office director, Police Colonel Rhoderick Mariano, nga usa sa ilang tan-awon ang pagpanggawas sa mga sakyanan sa kadalanan sama sa nahitabo sa kaulohan nga halos maglisud og kontrol ang kapolisan bisan pa nga gipaubos na sila sa Modified Enhanced Community Quarantine (MECQ).

“Kung ano yung gagawin ng bawat city at munisipyo na bagong ano sa transition nato na patakaran o mga ordinansa na kanilang ilalabas in support sa duon sa ordinansa na ilalabas ni Governor para sa transition ng ECQ to GCQ,” matud ni Mariano.

Estrikto gihapon

Una na nga gipahibawo ni Mariano nga bisan pa man nga ipaubos ngadto sa GCQ ang Probinsiya sa Sugbo magpadayon gihapon ang ilang estrikto nga pagpatuman o pagbantay sa mga Quarantine Border Checkpoints.

Kini ilabi na nga usa sa gitan-aw sa bag-o nga EO ni Garcia nga tugutan nga maligo sa dagat sugod alas 8 sa buntag hangtud sa ala 1 sa hapon.

Apan gihimug-atan sa maong mando nga dili gihapon mamahimo nga molabang sa laing lungsod ang buot nga mangaligo ug kanunay nga bantayan ang pagpatuman sa physical social distancing.

Samtang sa Cebu City Police Office, padayon nga istriktohon ang pagsulod ug paggawas sa mga checkpoints ilabi na nga ang silingan nga Dakbayan sa Talisay anaa pa sa Modified Enhanced Community Quarantine (MECQ) apan ang Dakbayan sa Sugbo nagpabilin gihapon nga ECQ.

Gipasabot ni CCPO director, Police Colonel Josefino Ligan, nga dili sila mokompiyansa tungod sa pagtuo nga kung luagan na ang mga silingang lugar sa probinsiya mahimong daghan usab ang gusto nga mosulod sa Dakbayan sa Sugbo.

“Wala in fact atoa ning panghingusgan pa gihapon hinuon kay basig mokusog ang flow sa mga tawo kay tungod sa uban nga nag-declare nag MECQ so mas mopahugot pa ta,” matud ni Ligan.

Dugang ni Ligan nga ilang istriktohon ang pagsusi sa mga motorista nga mosulod sa Dakbayan sa Sugbo diin kadto lang mga essential ang makabiyahe.

Sama sa ilang unang gipatuman mao usab kini hangtud sa matapos ang ECQ sa Mayo 31 nga maoy mando sa Inter-Agency Task Force (IATF).

Panawagan niya sa mga molupyo sa probinsiya nga nagtinguha nga moanhi sa Dakbayan sa Sugbo sa pagtuo nga susama ra ang gipatuman karon nga dili na nalang sila moanhi sa siyudad tungod kay nagpadayon ang ECQ. /GMR (BANATNEWS)