Kapitan mag-atubang og daghang kaso tungod sa tigbakay

CEBU, Philippines — Tulo ka kaso ang isang-at batok sa usa ka barangay kapitan sa Lungsod sa Balamban human nga nagpahigayon kini og tigbakay sa ilang barangay.

Kasong kalapasan sa Bayanihan Heal As One Quarantine Law, Presidential Decree 499 kon Illegal Cockpit Law, ug Provincial Ordinance 2020-05 kon Enhanced Community Quarantine ang ipasaka batok ni Kapitan Wilfredo Alvarado sa Barangay Lamesa.

Si Alvarado maoy subject sa operasyon sa Regional Special Operation Group (RSOG-7) human nakadawat og impormasyon kalabot sa pagpahigayon og tigbakay sa iyang       barangay.

Matud ni Balamban Police Station chief, Police Major Christian Torres, nga dugay na nila nga gibadlong ang kapitan kalabot sa ilegal nga sugal kon tigbakay sa ilang barangay.

Apan kanunay kini magginahi og ulo ug dili mopatuo sa kapolisan.

Niadtong Mayo 15 nagpahigayon og joint operation ang RSOG-7 ug Balamban Police Station ngadto kang Alvarado tungod sa impormasyon nga nadawat sa nagpadayon nga tigbakay sa panahon sa Enhanced Community Quarantine.

Apan sa maong operasyon dali nga nakadagan ang kapitan ug pagsusi sa ilang panimalay wala na kini nila naabti.

Hinuon nadakpan silang Ruben Sacamay Gabutin, 56, nga taga Barangay Prenza; Judito Bantiles Dumdum, 35, taga Sitio Nazareno Barangay Biasong; Teodoro Madarang, 61, taga Sitio Bungkalo, Barangay Lamesa; Jeronio Banate, 49, taga Sitio Checkpoint, Barangay Lamesa, ug Jovanie Basillote, 27, taga Sitio Ipil, Barangay Lamesa, pulos sa Lungsod sa Balamban.

Samtang gipanawagan sa Cebu Provincial Police Office (CPPO) ang tanan nga kung dili nila gusto madakpan dili nalang unta mopahigayon og ilegal nga sugalan o mosupak sa balaud. /GMR (BANATNEWS)