Kwarta sa SAP, UCT gisugal, 6 sikop

CEBU, Philippines — Gidakop sa kapolisan ang unom ka sugarol og tong-it sa Sitio Camino, Barangay Gabi, Lungsod sa Cordova nga ang tulo kanila beneficiaries Special Amelioration Program sa Department of Social Welfare and Development.

Ang laing duha beneficiaries sab sa Unconditional Cash Transfer sa nasudnong kagamhanan.

Si Police Lieutenant Jan Ace Elcid Layug, hepe sa Cordova Police Station, niila sa ilang mga dinakpan nga sila si Jovan Seguisabal, 25; Analy Inting, 43; Florilyn Inting, 52; Marcelo Garrido, 43; Emmanuel Inting, 19, ug Camelo Seguisabal Jr., 28-anyos nga pulos nagpuyo sa maong dapit.

Matud pa ni Layug nga walay hunong ang ilang pahimangno sa mga molupyo labot sa hugot nga gipatuman nga enhanced community quarantine apan ang maong mga dinakpan daw wala gyud manumbaling hinuon nagpahigayon pa og ilegal nga sugal sa maong lugar nga maoy hinungdan sa ilang pagkasikop.

Samtang sa Sitio Catugasan, Barangay Casili, Dakbayan sa Mandaue duha sab ka pusher og shabu ang nadakpan sa buy-bust operation alas 10 pasado sa niaging gabii.

Si Police Major Veriño Noserale, hepe sa Consolacion Police Station niila sa ilang mga dinakpan nga mao sila si Jackwell Jayme, 34, ug Ace Carpio, 26, nga pulos nagpuyo sa maong dapit kinsa nakuhaan usab og lima ka gagmay nga pakete sa shabu ug mga drug paraphernalia. – Romeo T. Limpangog/GMR

Sunog niulbo sa usa ka mall

Dul-an sa P200 mil ang danyos sa sunog nga niulbo sa usa ka dakung mall nga nahimutang sa may North Reclamation Area, Dakbayan sa Sugbo kagahapon sa hapon.

Nadawat sa kabomberohan ang alarma sa maong sunog ala 1:20 ug giisa sa second alarm ala 1:24, third alarm pagka ala 1:28 ug ala 1:57 na under control ug alas 2:12 hingpit nga na fire out.

Hinoon walay gikataho nga nakalas o naangol sa maong sunog.

Niresponde ang 11 ka fire trucks sa maong sunog nga naglakip usab sa mga fire volunteer brigades sa kabarangayan.

Sa pagkakaron ang Cebu City Fire Arson Investigation Unit sa Cebu City Fire Station pinangulohan sa ground commander, Chief Inspector Josephus Alburo mohimo pa og imbestigasyon.

Apan base sa inisyal nga pakisusi didto nagsugod ang kayo sa ikalima nga andana sa parking area.

Matud pa Senior Fire Officer 3 Hermes Molina nga sa inisyal nga imbestigasyon giingong nagsugod ang sunog sa storage room sa ikalima nga andana sa parking area ug base sa alegasyon nga adunay nibuto.

Gitug-an ni Molina nga giingong nag-fluctuate ang power supply sa opisina sa security personnel hinugndan nga gisusi ang nahimutangan sa storage room ug didto dili na maduol tungod kay baga na ang aso ug daku na ang kayo.

Dugang pa ni Molina nga gipaningkamutan sa kabomberohan nga dili mokatap ang kayo sa maong establisemento ug mapasalamaton usab sila kay sa Dakbayan sa Sugbo aduna silay ladder nga makasaka ngadto sa mga taas nga building.

Gipaubos pa gihapon nila ni Molina sa imbestigasyon ang hinungdan sa maong pag-ulbo sa sunog. /GMR (BANATNEWS)