Kapitan nipahimangno batok fake news

CEBU, Philippines — Nipahimangno ang mga opisyal sa Barangay Poblacion Pardo, Dakbayan sa Sugbo sa katawhan nga mahimong manubag sa balaud kadtong magpakatap og fake news nga makahatag og kabalaka sa publiko.

Kini ang gitug-an ni Kapitan Litang Abarquez sa Poblacion Pardo pinaagi sa iyang social media post.

Ang pamahayag ni Abarquez giluwatan human adunay mga netizens ang nipakatap og fake news nga giingong adunay lockdown nga mahitabo sa ilang barangay.

Matud ni Abarquez nga walay mahitabo nga lockdown sa ilang barangay ug dili sila angayan nga motuo sa mga gipakatag nga mga fake news.

Giklaro ni Abarquez nga gi-cordon nila ang police station tungod kay gipang swab test ang mga polis ug mga persons deprive of liberty human adunay usa ka piniriso nga nagpositibo.

Gitug-an ni Abarquez ngadto sa mga nagpakatap og fake news nga mahimo silang manubag sa balaud ug andam ang barangay nga mogukod sa mga nagpaluyo niini.

“Timan-i ninyo ang pagpaubos og LOCKDOWN sa usa ka lugar o barangay magsubay og CRITERIA o LAGDA. Sama sa deklarasyon sa State of Calamity nga may lagda o criteria nga pagasubayon. Sama sa SAP o Special Amelioration Program sa DSWD nga daghan ninyo ang nasuko tungod sa gitawag og CRITERIA,” matud sa post sa kapitan.

Ang barangay administrator sa Poblacion Pardo nga si June Berongan nitug-an nga angay lamang motuo ang mga Pardohanon ngadto sa mga kasaligan nga tinubdan ug susihon nila ang gigikanan niini ug dakung bakak nga ipaubos sila sa lockdown. /GMR (BANATNEWS)