100 pamilya sa Liloan natabangan sa PNP

CEBU, Philippines — Niabot ngadto sa usa ka gatos ka pamilya ang nakabenepisyo sa hinabang nga gihatag gikan sa Police Regional Office 7 sa Barangay San Vicente, Lungsod sa Liloan.

Kini subay sa Adopt A Family Kapwa Ko Sagot Ko Program sa Philippine National Police (PNP).

Nangunay sa pagpanghatag si PRO-7 Regional Director Police Brigadier General Albert Ferro nga maoy naghatag sa hinabang ngadto sa mga kabus nga pamilya sa lungsod.

Matud pa ni Ferro nga ang pamilya nga ilang gihatagan mao kini ang mga pamilya nga grabe nga naapektohan sa novel coronavirus human nga halos wala nay pagkaon.

“I think the less capable families were chosen to receive ang atong ayuda para ma-balance nato ang those are capable naa pa silay pamaagi pero kining mga less capable atong gitabangan,” matud ni Ferro. Dugang pa niya nga matag food pack nga gipanghatag mobalor kini og kapin sa P1,000 nga naglangkub sa bugas, utanon ug uban pa nga panud-an.

Moabot na ngadto sa kapin 22,000 ka pamilya sa Central Visayas ang natabangan sa PRO-7 subay sa programa sa PNP.

Gawas sab niini nahatag na sab sa PRO-7 ang P11 milyones nga natigum gikan sa pag-abag sa tanan nga kapolisan sa Central Visayas isip tabang sa naapektohan sa virus ngadto sa kagamhanan ubos sa administrasyon ni Presidente Rodrigo Duterte.

Ang sobra niini maoy gipamalit og pagkaon nga mao usab ang ilang gihatag sa mga Sugboanon nga naglisud sa ilang kinabuhi niining panahon sa krisis. /GMR (BANATNEWS)