Beauty queen, uyab nakapiyansa na

CEBU, Philippines — Nakapiyansa na ang Cebuana beauty queen ug uyab niini nga Spanish national kinsa gidakop nga nangaligo sa dagat ug nag-inom sa Lungsod sa Moalboal nga kalapasan sa lagda sa enhanced community quarantine.

Matud ni Cebu Provincial Police Office Director Rhoderick Mariano nga Miyerkules sa hapon nipiyansa sila si Maria Gigante ug Javier Castro.

Gawas niini kasamtangan nga gipaubos og 14 ka adlaw nga quarantine period ang duha sa Lungsod sa Argao nga maoy hangyo sa duha.

Hinuon gipasalig sa CPPO nga ila gihapon i-monitor ang duha ilabi na ang pagpa-swab test niini gumikan kay gikan kini sa Dakbayan sa Sugbo.

Kalapasan sa Article 151, Section 9 sa Republic Act 11332 ug falsification of public documents ang kasong gipasaka batok sa duha.

Kung mosibat ang duha gikan sa pag-quarantine kanila, hayan dugang kaso ang ilang atubangon. /GMR (BANATNEWS)