Dugang duha ka polis sa CCPO COVID-19

CEBU, Philippines — Lain duha na sab ka polis ang nataptan sa coronavirus disease sa Cebu City Police Office.

Kini maoy gipahibawo ni CCPO Director Josefino Ligan human nigawas ang resulta sa pagpositibo sa 16 ka polis ug tulo ka non-uniformed personnel gikan sa San Nicolas Police Station. Matud ni Ligan nga ang dugang duha nga nagpositibo sa Carbon PS nagpuyo sa Barangay Pasil diin posible nga nakuha ang virus.

Gibutyag ni Ligan nga taud-taud na sab nga wala ni-report ang duha ka polis human gihilantan ug giubo.

Kasamtangan karon nga gibutang sa Don Vicente Rama Memorial National High School sa Barangay Basak San Nicolas ang tanang polis nga nataptan lakip na ang tulo ka NUP.

Ang hepe sa Carbon PS nga si Police Captain Alvin Llamendo nagkanayon nga magpahigayon sab sila og contact tracing sa mga nahimamat sa mga polis nga nagpositibo. Kasamtangan nga gipang-isolate ang kapin sa 50 ka polis sa Carbon PS diin wala una sila pagawasa ug papaulia sa ilang panimaye samtang nagpaabot sa kamanduan sa ilang labaw. Ipaubos ang 54 ka personnel sa Carbon PS sa COVID test aron maseguro kung wala bay natakdan kanila aron mabutang sa isolation area.

Gipaabot sab ni Ligan ngadto sa tanang polis sa CCPO nga magpadayon sila tungod kay mao kini ang gisangon kanila aron lang mahatagan og proteksyon ang publiko ug mopatuman sa kahusay ug kalinaw bisan pa man nga risgo kini sa ilang kinabuhi.

Dili kabalak-an

Nunot niini si Konsehal Dave Tumulak niingon ang mga residente sa Barangay Basak San Nicolas dili angayan mahadlok sa mga gipang-isolate nga mga polis sa maong tunghaan. Matud sa konsehal nga dunay mga polis nga nagbantay sa mga gipang-quarantine ug dili sad sila makagawas sa tunghaan.

“Ang atong lang hangyo sa mga residente nga instead mahadlok sila mogawas ang mga positive nga mga polis, ang ilang buhaton magbantay sila sa gawas nga wala’y makasulod ngadto sa Don Vicente Rama High School mao ang atong gibantayan,” matud ni Tumulak.

Samtang nagmalampuson sab ang pagbalhin sa mga positive patients nga asymptomatic sa Barangay Bacayan. Sigun ni Konsehal Joel Garganera nga challenging ang ilang pag-pull-out sa mga nagpositibo tungod kay ang eskwelahan nga gihimong Barangay Isolation Center tungason.

“Kana sila nagpuyo na sila sa Upper Bacayan diin aduna tay mga 60 kabuok didto nag-lockdown nata, in fact ang barangay nag-lockdown na sila kita the other day ato sad gitagaan sad sa atong ayuda sa siyudad gipanagaan nato sila og bugas 25 kilos, mga canned goods,” matud ni Garganera.

Dili pasagdan

Sa iyang bahin, si Police Regional Office 7 Director Albert Ignatius Ferro andam mohatag sa tanang ayuda ngadto sa iyang mga sakop nga nagpositibo sa COVID-19. Matud ni Ferro nga dili niya pasagdan ang iyang mga tawo ug nakighinabi na usab siya niini ug gipasaligan nga anaa sila kanunay andam mosuporta ug giawhag kini niya nga pabilin usab sila sa pagka-maampoon.  Iyang giawhag ang mga nagpositibo nga dili magpakawala sa paglaum bisan sa mga problema nga ilang giatubang karon.

Gipasalig usab ni Ferro nga lakip ang pamilya sa mga polis nga nagpositibo ang ilang hatagan og tabang.

Gitug-an ni Ferro nga gipa-deposit una niya ang armas sa mga polis nga nagpositibo aron dili sila makahuna-huna og dautan sa higayon nga mahasol ang ilang panghuna-huna.

Ang kagamhanan sa Dakbayan sa Sugbo andam sab sa paghatag sa tanang ayuda. Decemay P. Padilla, Rowena D. Capistrano/GMR (BANATNEWS)