Cebu-Talisay border sa SRP natrapik
CEBU, Philippines — Nasinati ang huot sa trapiko gumikan sa taas nga kutay sa mga sakyanan sa may utlanan sa Dakbayan sa Talisay gikan sa Dakbayan sa Sugbo kagahapon sa buntag. Kini human naobserbahan nga daghang sakyanan ang nanggawas gikan sa Siyudad sa Sugbo ug nisulod sa Dakbayan sa Talisay.
Si Jonathan Tumulak, traffic czar sa Dakbayan sa Talisay, nitataw nga normal nga pagsusi lang ang gibuhat sa kapolisan, navy, kabomberohan ug mga enforcers ang gipatuman alang sa mga tawo nga mosulod sa border.
Apan ang gidaghanon sa mga sakyanan nga nanggawas ug mopaingon sa Dakbayan sa Talisay maoy nakadala og trapiko kay dungan man kini.
Ang kapolisan adunay rekord sa mga sakyanan nga matag adlaw moagi lakip na ang mga frontliners.
Si Tumulak nagkanayon nga iya kining gipaabot aron sab nga matun-an kun unsa ang ilang mabuhat labot niini.
Adunay mga sakyanan nga gipabalik sa agi gumikan sa kakuwang sa ilang dokumento nga gipakita.
Ang kutay sa mga sakyanan niabot lapas sa taytayan sa South Road Properties. /GMR (BANATNEWS)
- Latest