P1 milyones shabu sakmit, tulo sikop

CEBU, Philippines — Kapin sa P1 milyon nga balor sa shabu ang nasakmit sa kapolisan sa Lungsod sa San Fernando gikan sa tulo ka dinakpan sa Barangay Pitalo niadtong Lunes sa gabii.

Giila ang mga dinakpan nga sila si Vergel Luna Jr, 26; Carlo Collados, 26, ug Anthony Balmori, 26-anyos, pulos taga Dakbayan sa Talisay.

Matud ni Police Captain Efren Diaz Jr., hepe sa San Fernando Police Station, nga ang impormasyon gikan sa ilang mga nadakpan kalabot sa ilang palitanan og shabu sa Dakbayan sa Talisay.

Gilusad ang duha ka semana nga surveillance operation ug nasuta nga dili mominus sa 250 gramos nga shabu ang mabaligya matag adlaw sa tulo sa Lungsod sa San Fernando.

Si Cebu Provincial Police Office Director Rhoderick Mariano nagkanayon nga ang maong operasyon nagpakita nga bisan nagpadayon ang pagpakigbatok sa COVID-19 nagpadayon gihapon ang pagpangdakop sa ilegal nga drugas.

Nagpakita sab kini sa malampuson nga pagpagkang sa ilegal nga drugas sa Dakbayan sa Talisay tungod kay dali nalang kini nga mamonitor sa silingan nga lungsod sama sa San Fernando.

Menor de edad

Nasikop sa kapolisan sa Presinto 1 sa Mandaue City Police Office ang tulo ka lalaki na naglakip sa duha ka menor de edad nga naghupot og shabu alas 10 pasado sa niaging gabii sa Sitio Liong, Alang-Alang, Dakbayan sa Mandaue.

Si Police Major Ramil Morpos, hepe sa Presinto 1 sa MCPO, niila sa nadakpan nga si Benjie Ople, 31, ug duha ka 16-anyos nga lalaki nga kauban niini.

Gihimo nila ni Morpos ang buy-bust operation batok ni Ople kinsa nakuhaan og usa ka gamay nga pakete sa shabu bugti sa marked money nga P300 nga gigamit sa poseur buyer sa kapolisan.

Nakuha ang lain pang 11 ka gagmay nga pakete gikan sa tulo ka dinakpan kinsa gibalhug sa detention cell samtang ang mga menor de edad ang gitugyan ngadto sa City Social Welfare and Development Office.

HVI wa kaipsot

Sa laing bahin usa ka High-Value Individual ang nasikop sa buy-bust operation sa mga sakop sa Provincial Intelligence Branch sa Ramona Village, Barangay Dumlog, Dakbayan sa Talisay niadtong Lunes sa gabii.

Ang dinakpan nailhan nga si Martino Garido, 47, nagpuyo sa maong dapit.

Ang operatiba nakigsabot ni Garido nga mopalit og ilegal nga drugas hangtud nga kini nadakpan.

Walay nakamatikod sa operasyon bisan pa man sa pagbantay sa mga molupyo sa ilang lugar nga walay laing tawo nga makasulod.

Nakuhaan og shabu ang dinakpan nga nitimbang og 12 gramos nga adunay gibana-bana nga kantidad nga P81,600.

Nagulo sa maong operasyon ang pangulo sa PIB nga si Police Lt. Col. Marlu Conag uban sa mga sakop niini ug sa pagpakig-alayon sa Philippine Drug Enforcement Agency 7. Romeo T. Limpangog, Gabriel C. Bonjoc, Rowena D. Capistrano/GMR (BANATNEWS)