Beauty queen, uyab nga langyaw gidakop

CEBU, Philippines — Giingong Beauty Queen ug uyab niining langyaw nga Espanyol gidakop sa kapolisan sa Moalboal Police Station tungod sa  pagalapas sa Enhanced Community Quarantine sa dihang nangaligo ang duha sa Panagsama Beach Basdiot, Moalboal Domingo sa hapon.

Ang insidente nakapasagmuyo kang Cebu Gov. Gwendolyn Garcia kinsa mimando og hugot nga pagbantay sa mga utlanan sa probinsya ug Cebu City aron dili basta makagawas ang mga dili otorisadong mga tawo gikan sa maong siyudad padung sa kalungsoran.

Ang duha giila nga silang Maria Sesaldo Gigante, 26, taga Barcelona Street, Villa Del Rio, Barangay Bacayan sa Dakbayan sa Sugbo ug ang giingong uyab niini nga si Javier Castro, 35, nagpuyo sa usa sa mga condominiums sa I.T. Park

Si Gigante mao ang Miss Cebu Charity 2017.

Matud pa ni Corporal Aiza Gocotano, sa Moalboal Police Station, sakay sa Black Hyundai nga adunay plakang 7279 padulong sa Alegria ang duha.

Sumala pa ni Gocotano, sa dihang niagi sa Quarantine Control Points ang duha nipakita sila og certification gikan sa usa ka partilistang kongresista isip usa ka staff si Castro nga gitahasang maoy mo consolidate sa mga donasyon para sa relief operation.

Dugang pa ni Gocotano, adunay nakapahibalo nga concerned citizens ngadto sa kapulisan nga adunay nangaligo sa dagat hinungdan  giadto kini sa mga tourist police ug didto nakit-an sila Gigante ug Castro.

Ang duha giingong nakalapas sa ECQ ug sa liquor ban nga gipatuman sa lungsod.

Si Garcia sa iyang bahin nakapangutana kun nganong nakalusot ang duha gikan sa Cebu City padung sa lungsod sa Moalboal nga daghan man untang checkpoints. "You are not amongst the exempted person. Ambot nganong nakalusot mo sa atong borders. Mangutana gyud ko kinsa ang mga police atong adlawa," matud ni Garcia.

Ubos sa Executive Order sa gobernador gitugtan ra nga makalusot mao ang mga kongresista. Apan nahibulong siya kun nganong nakagamit og selyo sa House of Representatives ang sakyanan sa manag-uyab.

"Unlawful baya ng using the seal without proper authority," matud ni Garcia. Matod ni Garcia nga si Castro giingong nangasaba pa didto sa Moalboal kun nganong wala sila gitugtan nga mo check-in.

"Bisita ra ka pag tener og kortesiya," matud ni Garcia. Le Phyllis F. Antojado/IBM (BANATNEWS)