Cortes: Dili insentibo ang ihatag sa magpaubos sa rapid test

CEBU, Philippines — Giklaro ni Mayor Jonas Cortes sa Dakbayan sa Mandaue nga wala sila mag-promote og pagpanghatag og mga insentibo aron adunay daghang magpaubos sa rapid testing nga gihimo karon sa siyudad dungan sa Cebu City ug sa Lapu-Lapu City.

Matud pa ni Cortes ang ilang gikinahanglan  mao ang tukmang datos aron aduna silay kapasikaran uban sa lain-lain nga dakbayan sa ila unya mga desisyon sa paglibkas na sa ECQ ngadto sa General Community Quarantine.

Sumala pa ni Cortes, gusto niyang klaruhon nga sa higayon nga adunay magpositibo sa rapid test diha sa dakbayan aduna na silay giandam nga stay at home kits para sa duha ka semana nga ilang ihatag sa magpositibo, ug kun gikinahanglan ila pa kining pun-an.

Ang stay at home kits naglangkob sa bugas, sabon, mantika, toothpaste o mga nag-unang panginahanglanon sa katawhan samtang sila naka quarantine.

Gitug-an ni Cortes, ang unang tulo ka adlaw sa ilang pagpahigayon sa testing hinay ang turn-out tungod kay nadungan man kini sa pag-apod-apod sa ilang social amelioration program.

Apan karon daghan nang mga tawo ang nakasabot sa kamahinungdanon niining rapid testing sa Project Balik Buhay ug malaumon siya nga daghan pa gyud ang mosanong ug makab-ot nila ang ilang target nga gidaghanon. /IBM (BANATNEWS)