TESDA centers nanghimo og PPEs

CEBU, Philippines — Hinimo sa nagkalain-laing training centers sa Technical Education and Skills Development Authority 7 ang mga personal protective equipment nga ilang gihatag sa Vicente Sotto Memorial Medical Center.

Matud ni TESDA-7 regional director, Dr. Floro Ringca, nga ang maong mga PPEs namugna human nihangyo ang VSMMC pinaagi ni Dr. Gerardo Aquino, medical center chief, nga ang TESDA maoy mohimo sa maong mga PPEs.

Niadtong Abril 6 nagsugod ang TESDA pagtahi sa mga PPEs diin ang training center nga nihimo niini mao ang regional training center sulod sa ilang compound sa may Salinas Drive.

Lakip na niini ang mga provincial training centers sa Lungsod sa Minglanilla ug Dakbayan sa Toledo ug niabag sab ang Sisters of Mary School Boys ug Girls Town nga rehistrado sa TESDA ang ilang dress making program.

Gisugdan sa TESDA ang ilang mass production niadtong Abril 13 gani dunay mga inisyal nga pag-turnover sa mga PPEs sama niadtong Abril 21, 180 ka PPE ang nahatag; Abril 27 laing 303 ka PPEs ang nadugang; Mayo 8, 110 kabuok ang gi-turnover ug kagahapong adlawa adunay 920 ka PPE ang gihatag sa tambalanan.

Moabot tanan sa 1,513 ka PPE ang nahatag sa TESDA sa VSMMC nga daku og tabang sa mga medical personnel nga nakigbatok karon dili lang sa coronavirus disease pandemic apan ingon man sa laing mga sakit.

“By the way ang kaning mga materyales nga gitahi nato ani gikan ni sa Vicente Sotto kani siya so igo lang TESDA gatahi, ga-produce aning maong mga PPE so ang target nato 1,500 pero nakasobra tag 13 mao nahimo og 1,513,” matud ni Ringca.

Gawas sa mga PPEs duna say facemask nga gihimo ang ilang mga provincial training centers sa Lungsod sa Carmen, Minglanlla, Daanbantayan ug Siyudad sa Toledo ingon man sa Bohol, Negros Oriental ug Siquijor nga moabot tanan sa 18,012 ka washable facemask nga nahatag na sa mga frontliners.

Naghimo sab sila og pastries nga gipanghatag gihapon sa mga frontliners.

Samtang si Aquino sa iyang bahin niasoy nga tungod kay ang pagpalit og PPE problema gyud sa tanang lugar nga nag-atubang sa krisis sa COVID-19 duna sila’y rational use sa mga PPE.

Pasabot niini  kadtong area kun asa ang mga positive cases mogamit gyud sila niadtong disposable PPE apan sa mga areas nga wala’y positive cases apan kinahanglan protected gihapon kining mga washable PPE ang gamiton. /GMR (BANATNEWS)