Kapin 30 mil ka mamumuo natabangan sa DOLE-7

CEBU, Philippines — Ang Department of Labor and Employment -7 mipahibalo nga 31,618 ka mga mamumuo gikan sa 1,403 ka mga kompanya sa Central Visayas ang nakadawat na sa COVID-19 Adjustment Measures Program (CAMP) sa ilang ahensya.

Ang DOLE-7 nakahatag na og P158,090,000 nga tabang pinansyal alang sa mga apektadong mga mamumuo.

Sumala pa ni Luchel Taniza, DOLE-7 regional information officer, ang CAMP usa ka one-time cash aid nga moabot og P5 mil nga gipaagi sa money remittance centers.

Duna pay uban nga nagpaabot sa ilang transaction codes aron makuha na nila ang ilang kwarta sa remittance centers sumala lang Taniza.

Si DOLE-7 Regional Director Salome Siaton mibutyag nga dili tanan sa mga ni-apply ang nahatagan. Sa pagkakaron, gihan-ay pa nila ang mga listahan sa mga benepisaryo sa CAMP sa rehiyon aron maduso na ngadto sa ilang ulohang buhatan tungod kay gikinahanglan kini sa Department of Finance sa ilang Small Business Wage Subsidy (SBWS) program.

Matud pa sa DOLE-7 dunay 51,389 ka mga trabahante ang naapektahan sa flexible work arrangements (FWAs) ug kadtong mga empleyado sa mga kompanyang temporaryong nanirado nga 1,785 ka establisamento. The Freeman/IBM