Kaso sa COVID sa carreta nagkadaghan

CEBU, Philippines — Samtang nagpadayon ang gihimong mass testing sa kagamhanan sa siyudad sa Sugbo alang sa pagbatok sa coronavirus disease(COVID)-2019,  padayon sab nga nadugangan ang gidaghanon sa mga nataptan sa maong sakit dinhi sa dakbayan.

Base sa talaan sa Mayo 10 nga gipagawas sa Cebu City Health Department kagahapong adlawa, 40 ka bag-ong confirmed cases ang natala sa siyudad.

Ang kinadaghanan og bag-ong kaso mao ang Sitio Negative sa Barangay Carreta nga nakatala og 33 ka mga positibo. Samtang usa sa Alaska Mambaling; duha ka bag-ong kaso sa Barangay Sambag 2; usa ka kaso sa Sitio Bato Barangay Ermita; laing usa sa Barangay Punta Princesa; usa ka kaso sa Sunset Drive sa Barangay Lahug ug usa ka OFW kansang address padayon pang gisuta.

Ang Cebu City Health Department mipahibalo nga nagpahigayon na sila karon og contact-tracing.

Awhag nila sa katawhan nga magbinantayon ug mag-obserbar og proper hygiene, magsul-ob sab og mask, manghugas og kamot ug magpabilin sa balay ug kun pananglitan dunay gipamati sa lawas magpakunsulta.

Subay niini bag-ong 33 kaso sa COVID-19 sa Barangay Carreta, si Mayor Edgardo Labella mimando sa pagbalhin sa tanang asymptomatic ngadto sa Barangay Isolation Center nga mao ang Carreta Elementary School.

Sa pagkakaron, ang Brgy. Carreta aduna nay 45 tanan nga mga kaso. Sa gihimong mass testing sa maong barangay 398 ang nag negatibo.

Tungod niini, niabot na tanan og 1474 ang mga positibo sa coronavirus dinhi sa siyudad.

Ang mga bag-ong kaso nahibaw-an ug nasubay pinaagi sa contact tracing ug pagpaubos sa mass swab testing diha sa mga apektadong mga barangay. /IBM (BANATNEWS)