Kapolisan mosusi sa iregularidad

CEBU, Philippines — Gitahasan sa Police Regional Offices 7 ang Criminal Investigation and Detection Group 7 nga mopahigayon og imbestigasyon kalabot sa iregularidad sa pagpangapud-apud sa Special Amelioration Program (SAP) sa Dakbayan sa Lapu-Lapu.

Si Presidente Rodrigo Duterte mimando nga paimbestigaran sa kapolisan ang mga barangay opisyales nga nangurakot sa SAP lakip na ang pagsigurong ang mga nahatagan kwalipikado gyud.

Matud ni PRO7 Director Police Brigadier General Albert Ferro ang imbestigahon nila ang matud pa pagdawat sa SAP sa halos tanang sakop sa usa ka pamilya diha sa Dakbayan sa Lapu-Lapu.

PNP moimbestigar

Mao sab kini ang ilang himuon sa uban pang mga barangay nga diin adunay daghang mga alegasyon sa iregularidad sa paghatag sa SAP.

“If there are abuses there are fraction we will a necessary case and if there is no complainant the PNP will be the nominal complainant,” matud pa ni Ferro.

Samtang si CIDG7 Deputy Regional Chief Police Major Ronald Allan Tolosa nagkanayon nga ilang sutaon kung adunay tulubagon ang social worker nga giingong maoy naglakip sa iyang mga kabanay sa lista aron makadawat sa SAP.

Bisan kadtong mga miuli sa tag P6 mil imbestigahon gihapon.  Gikuha na sab ang mga pangalan sa mga benepisaryo aron subayon kun kwalipikado sila niini.

Si Cebu City Police Office (CCPO) Director Police Colonel Josefino Ligan miingon nga mohimo sab sila og imbestigasyon kun duna silay madawat nga reklamo.

Sa Cebu City, adunay mga pasangil gikan sa mga barangay nga dunay pinalabi sa gipanghatagan.

Ang imbestigasyon mahitungod kini sa social worker sa siyudad sa Lapu-Lapu nga gipasanginlang nipaapil sa tibuok pamilya aron makadawat sa SAP.

Sa pakigatubang sa maong social worker kang Mayor Junard Chan kini miingon nga dili siya maoy naghatag sa mga forms para niadtong makadawat sa SAP diha sa ilang barangay sa Basak.

Sumala pa niya, tungod sa gidaghanon wala na niya masusi tagsa-tagsa ang matag na suwatan na nga forms. Nalakip  sa mga nakadawat ang inahan niining senior citizen, duha ka igsuong mga PWDs, bayaw nga babaye  ug ang uyab sa anak niining lalaki. Silang tanan nakadawat og tag P6mil.

Giawhag ni Lapu-Lapu City administrator Danilo Almendras si Acting City Attorney James Allan Saysona paghimo og imbestigasyon sa maong social worker kun unsay tulobagon niini.

Ayaw og dawat

Sa pikas bahin, si Talisay City Mayor Gerald Anthony “Samsam” Gullas Jr. mipahimangno sa mga opisyales ug kawani sa dakbayan ug sa mga barangay nga dili modawat sa SAP aron dili sila madudahan nga dunay gipaboran.

“Ako na silang giingnan nga mga tanod, BHWs, Lupon o bisan unsa basta kawani sa barangay ang dili makadawat niini aron ang tawo kumpiyansa sa lista sa matagaan,” asoy pa ni Gullas.

Hinuon iyang gisaad nga ang iyang sweldo gikan sa buwan sa Abril hangtud sa Nobiyembre iyang ihatag aron bahinon sa mga kawani ug opisyales sa matag barangay.

Sa pagkakaron, ang siyudad nisiguro sa pagpanghatag sa tag 25 ka kilong bugas humay.

Samtang kadtong mga tawong wala gyud makadawat sa SAP aduna say madawat gikan sa siyudad.

Low-income earners

Ang Department of Interior and Local Government 7 sa pikas bahin,  niawhag sa mga barangay nga siguradohong unahon gayud ang mas labing nanginahanglan ug dili usa sagulan og pamolitika ang pagapud-apod sa SAP.

Si Michael Braga, tigpamaba sa DILG-7 nga nahinabi sa Banat News mingon nga adunay target nga beneficiaries base sa guidelines sa SAP ang DSWD nga maoy gibasehan kinsay mahatagan.

Bisan nahatagan ug naka fill-up sa SAP form dili tanan maaprubahan kay limitado ra.

Giklaro ni Braga, aduna silay advisory nga mahimong beneficiary ang mga BHW, Barangay Health Worker, Barangay Nutrition School, Barangay Tamod ug Day Care worker basta nalakip sila sa qualification isip low income earners.

Giawhag ni Braga, ang mga wala makadawat nga moduol sa ilang kapitan ug makig-alayon o kaha sa ilang local social welfare aron magpakisayud.

Si Braga, nitug-an kung ugaling adunay mapamatud-an nga giapil sa nakadawat og ayuda bisan dili kwalipikado mahimo silang makasuhan ubos sa Bayanihan to Heal as One Act o kasong sibil, kriminal ug administratibo.

Nangayo usab ug dispensa si Braga ngadto sa wala pa makadawat tungod kay adunay deadline ang mga LGU nga manghatag kutob karon adlawa Domingo Mayo 10 ang SAP.

Ang DSWD-7 gisuwayan pagtawag sa telepono aron pagkuha og pamahayag bahin sa isyu apan way nitubag. Rowena Capistrano, Gabriel Bonjoc, Romeo Limpangog/IBM (BANATNEWS)