BFAR nag-monitor sa presyo sa isda

CEBU, Philippines — Tungatunga niining krisis dala sa coronavirus disease (COVID-19) ug bisan dunay price freeze sa tanang mga dapit nga gipaubos sa enhanced community quarantine (ECQ), duna gihapoy mga reklamo kabahin sa kamahal sa presyo sa mga palaliton karon bisan pagkaon.

Kalabot niini, ang Bureau of Fisheries and Aquatic Resources 7 niawhag sa mga pumapalit nga dili magmakuli sa pagdangop sa ilang buhatan sa higayon nga adunay mga manindahay ug pagkaon dagat sama sa isda, kinhason ug uban pa nga mopahimulos sa panahon pinaagi sa pagpaburot sa presyo sa ilang baligya.  Si Alma Saavedra ang tigpamaba sa BFAR-7 nga nahinabi sa Banat News mitambag sa mga pumapalit nga kun sa ilang tan-aw sobra ra kaayo ang presyo diha sa merkado, mahimo nila kining idangop sa ilang buhatan.

Sumala pa ni Saavedra mahimo sab nga adto kini isumbong sa mga local government units o mobisita diha sa ilang buhatan aron sila matabangan sa pagduso sa reklamo batok sa maong mga vendors.

Gitug-an ni Saavedra, mahimo ra usab mopadangat sa ilang reklamo ang mga mamalitay pinaagi sa pagtaho ngadto sa social media page BFAR Region VII. Gipasalig ni Saavedra nga kanunay nag-monitor ang ilang buhatan kung dunay moreklamo apan hangtod ning pagtaho wala pa hinuon silay nadawat nga mga reklamo.

Hinuon, ang Dakbayan sa Sugbo pinaagi City Legal Office mipaimbestigar og 15 ka mga market vendors gikan sa mga publikong merkado sa dakbayan tungod sa pagpaburot nila og presyo sa ilang mga baligya. /IBM (BANATNEWS)