Broadcaster gipusil patay sa Dumaguete

CEBU, Philippines — Giumol na sa Negros Oriental Provincial Police Office (NORPPO) ang Special Investigation Task Group (SITG) sa pag-imbestigar sa pagpusil patay sa usa ka broadcaster sa Dakbayan sa Dumaguete, Probinsiya sa Negros Oriental niadtong Martes sa gabii.

Kini maoy gibutyag sa direktor sa NORPPO Police Colonel Julian Entoma human sa pagpamanhig patay kang Cornelio Pepino, 48-anyos, taga Lungsod sa Sibulan.

Matud ni Entoma nga si Pepino gikan sa gitrabahoan niining radio station sa Dakbayan sa Dumaguete diin niadtong higayona uban usab sa iyang asawa nga nisakay sa ilang motorsiklo nagbiyahe paingon na unta silang mopauli sa ilang balay sa Barangay Daro, Lungsod sa Sibulan.

Giingong lima ka buto sa armas ang kalit lang nga nilanog ug human niini nasukarap ang motorsiklo nga gisakyan sa magtiayon ug natumba.

Giingong ang gunman niduol kini kang Pepino ug giusban kini og pusil kaduha sa iyang ulo.

Ang asawa ni Pepino kinsa na-shock pa nakaangkon usab og mga pangos ug bun-og sa lawas gumikan sa pagkatumba sa ilang gisakyang motorsiklo.

Nakuha gikan sa crime scene ang lima ka kabhang sa bala sa .9mm pistol.

Usa sa gilantaw sa kapolisan nga hinungdan sa maong pagpamusil ang kalabotan sa trabaho ni Pepino isip radio commentator.

Lakip sa mopahigayon og imbestigasyon ang Criminal Investigation and Detection Group, Provincial Intelligence Branch ug Dumaguete City Police Station.

Si Pepino maoy ikatulong sakop sa media ang gipatay sa Dakbayan sa Dumaguete. /BDB (BANATNEWS)