DOLE-7 giawhag pagpasabot bahin sa ilang nahatagan sa CAMP ug uban pa

CEBU, Philippines — Giawhag sa hunta probinsyal ang Department of Labor and Employment (DOLE) nga mohatag og status report sa pagpatuman sa COVID-19 Adjustment Measures Program (CAMP) ug Tulong Panghanapbuhay sa Ating Disadvantaged /Displaced Workers  (TUPAD) ug Barangay Ko, Bahay ko (BKBK) Program ngadto sa mga apektado nga mamumuo.

Sa iyang resolusyon, si B0okal Glenn Anthony Soco nagkanayon nga niabot sa iyang buhatan ang reklamo sa pipila ka mga trabahante nga hangtod karon wala pa gihapon makadawat og assistance gikan sa DOLE bisan pa og nakaduso na sila sa mga requirements nga gikinahanglan aron makadawat.

“The affected workers have expresses their frustrations and disappointments in the conduct of the program’s implementation. Until now, they are awaiting for updates on their applications with DOLE. To make matters worse, beginning  16 April 2020, DOLE-7 stopped accepting applications in relation to CAMP,” pagbasa sa resolution ni Soco nga aprobado sa provincial board.

Gitug-an sab ni Soco nga dunay mga trabahante sab nga nibasol sa ilang mga employers kun nganong wala sila mahatagi sa among assistance.

Gusto sa provincial board nga ang DOLE mohatag og kumpleto ug comprehensive report kalabot niini nga naglakip sa gitaganang pundo, pila ang ni-apply ug pila ang naaprubahan ug kun kanus-a nahatag; pila ang pending applications ug uban pang report kalabot sa implementasyon sa mga programa sa DOLE. /IBM (BANATNEWS)