BFP: Mopalayo sa fire truck ug sa mga niresponde sa sunog
CEBU, Philippines — Ang kabomberohan sa Dakbayan sa Sugbo niawhag sa publiko nga hatagan og kahigayonan ang Cebu City Fire Station nga mohimo sa ilang mga trabaho.
Ang Cebu City Fire Department nagkanayon nga kong adunay sunog nga moulbo niining panahona diha sa bisan asa nga dapit sa dakbayan mohangyo sila sa publiko nga hatagan og higayon ang BFP personnel ug mga fire volunteer sa pakigkombati sa kayo.
Tinguha sa kabomberohan nga malikayan ang pagkuyanap sa covid-19.
Gipahimangnoan usab sa kabomberohan ang tanan nga mopalayo sa mga fire truck ug sa mga niresponde sa sunog.
Giawhag usab sa Cebu City Fire Department ang mga fire volunteer brigade nga moresponde sa pag-coordinate sa in-charge sa staging area alang sa hapsay nga pagresponde.
Gidasig usab lakip ang mga sakop sa media nga moresponde sa alarma sa pakig-alayon usab sa staging in-charge sa information officer o ngadto sa ground commander alang sa hapsay ug mas luwas nga pag-cover.
Ang Cebu City Fire Department nipadangat sa maong taho pinaagi sa ilang social media post ug mapasalamaton sa pagsabot sa katawhan ug niawhag nga magmaampingon kanunay. /BDB (BANATNEWS)
- Latest