Mga armas, makina nasakmit

CEBU, Philippines — Moabot sa 25 ka armas ug mga makina ang nasakmit sa pagpangronda sa Cebu Provincial Police Office (CPPO) Provincial Intelligence Unit sulod sa usa ka semana nga operasyon sa Lungsod sa Compostela ug Dakbayan sa Danao.

Gipangulohan ang maong operasyon ni Police Lieutenant Colonel Juan Byron Leogo subay sa Tabang ang Katawhan nga Likayan ang Armas (TIKLA). 

Nakuha mao ang nagkalainlaing homemade nga armas sama sa sub-machine gun, caliber pistol, mga makina sa paghimo sa armas ug uban pa.

Lakip nga nakuha ang nagkalain lain sab nga bala sa armas.

Samtang sa laing bahin mokabat sa 13 ka armas ang gitahan sa Cebu City Police Office (CCPO) City Mobile Force Company (CMFC) sa nagkalainlaing bukirang barangay sa Dakbayan sa Sugbo.

Pinangulohan ang maong operasyon ni Police Lieutenant Colonel Randy Korret sa Barangay Lusaran, Sudlon II, Sudlon I, Pamutan, Toong, Sapangdaku, Buot, Bonbon, Babag ug Malubog.

Kini subay gihapon sa gipahigayon nga minor operation sa panawagan sa pagpatahan sa mga armas sa bukid.

Nakuha mao ang usa ka unit sa.30 caliber carbine; duha ka units sa.22 caliber revolver; lima ka units sa .38 caliber revolver; duha ka units sa .38 caliber snub-nose; duha ka units sa 5.56mm revolver frontier; usa ka unit sa.45 caliber para ord pistol (Hi-cap) ug tulo ka units sa.357 caliber revolver. /GMR (BANATNEWS)