Mga barko dungan nga nagpabosina

CEBU, Philippines — Dungan nga nagpabosina ang mga barko sa mga pantalan ubos sa hurisdiksyon sa Cebu Port Authority kagahapon sa alas 12 sa udto isip pagtimaan sa International Workers’ Day o Labor Day 2020.

Ang kalihukan isip tubag sa panawagan sa International Chamber of Shipping (ICS) ug International Transport Workers Federation (ITF) sa mga seafarers lukop kalibutan nga patingugon ang ilang mga bosina sa barko isip pag-ila sa ilang natampo sa kalibutanong negosyo ug pamatigayon.

Si CPA General Manager Leonilo Miole niingon nga ang kalihukan maoy pagpasidungog sa importanteng papel sa mga seafarers ug mga trabahante sa pantalan alang sa paghatud sa mga pagkaon, gasoline ug krudo, mga medisina ug uban pang importanteng kinahanglanon sa katawhan.

Matud ni Miole nga pamaagi usab kini sa pagpaabot sa ilang pasalamat ngadto sa mga port frontliners niining gisagubang nga coronavirus pandemic sa walay pagkaluya bisan sa kakuyaw sa ilang panglawas aron lang pagseguro nga dili maundang ang operasyon sa pantalan.

Ang Associated Labor Unions-Trade Union Congress of the Philippines kusganon sab nga nagsuporta sa kalihukan.

“The Associated Labor Unions (ALU-TUCP) is an affiliate in the Philippines of the International Transport Workers’ Federation (ITF) and has also been supporting this call from the beginning,” matud sa ITF coordinator nga si Atty. Joselito “Boyet” Pedaria.

Atol sa Labor Day kagahapon, ang ALU-TUCP nagpasalamat sab sa mga frontliners kinsa padayong nagserbisyo sa katawhan panahon sa COVID-19 pandemic.

“We thank all workers for producing goods and rendering services, and for being critical co-creators of the wealth of the world,” matud ni Gerard Seno, ang ALU National Executive Vice-President.

Seno nanghinaut nga ang tanan makasungasong alang sa patas ug makatawhanon nga kondisyon sa panarbaho ubos sa gitawag nga “new normal”.