AWOL nga polis nasakmitan og drugas ug paraphernalia
CEBU, Philippines — Usa ka kanhi polis ang nasikop diha sulod sa gisak-an niining hotel sa usa sa mga barangay sa Dakbayan sa Lapu-Lapu human kini masakmiti sa gidala niya nga shabu ug drug parapaharnalia niadtong Miyerkules sa hapon.
Si Police Colonel Mark Gifter Sucalit, hepe sa CIU Intelligence Unit (CIU) sa Lapu-Lapu City Police Office (LLCPO) niila sa suspetsado nga mao si Nick Arthur Selanova Rebecca, 34 -anyos, ulitaw, lumad nga taga Purok Kalaboan, Barangay Santa Felomina, Dipolog, Zamboanga del Norte ug kasamtangan nga nagpuyo sa Barangay Bali-Bali sa Lungsod sa Compostela, Cebu.
Nasakmit gikan sa suspetsado ang shabu, drug paraphernalia ug P5,440.05 nga kwarta.
Dugang nakuha gikan sa maong suspetsado ang Philippine National Police (PNP) ID nga expired na ug driver’s license ug mga resibo sa giprenda niini diha sa nagkadaiyang pawnshop sa Sugbo.
Si Sucalit nagkanayon nga sa imbestigasyon nga ilang gihimo ilang nasayran nga ang maong dinakpan usa ka AWOL (Absent Without Official Leave) nga polis sa Cebu Provincial Police Office (CCPO) ug giingong maoy hinungdan nga natagtang kini sa serbisyo. /BDB (BANATNEWS)
- Latest