Managkapuyo gikasohan tungod sa kamatayon sa bata

CEBU, Philippines — Pormal na nga gipasakaan og kasong murder ang ama-ama sa 9 anyos nga lalaki human nga ang bata namatay tungod sa matud pa pagpangulata niini diha sa Barangay Bacayan Dakbayan sa Sugbo.

Si Talamban PS Chief Police Captain Jonathan Bethvoeen Taneo miingon nga napasaka na ang kaso kagahapong adlawa batok ni Rodante Dacallos samtang ang inahan sa bata nga si Rosita Adolfo pasakaan sab og kasong child abuse ug obstruction of justice.

Sa resulta sa medical certificate sa bata nga gipirmahan sa mga doktor sa Vicente Sotto Memorial Medical Center, nakaangkon og grabe nga bun-og sa lawas ang biktima tungod sa pag kulata niini gamit ang silhig.

Pasabot ni Taneo nga walay dag-anan sa suspek ang biktima tungod kay gamay kini ug linghod pa ang kalawasan.

Aron molig-on pa ang ebidensya batok sa duha, ipaubos nila sa autopsy sa PNP crime Laboratory ang patay’ng lawas aron masuta nila unsay kadaot nga nahiagoman niini sa sulod sa iyang lawas.

Giingon nga sukad pa niadtong 6-anyos pa ang bata nagdako na kini kulata gikan sa iyang ama-ama.

Apan matud ni Taneo nga ang suway nga pagikyas sa duha timailhan nga guilty sila sa gihimo nila ngadto sa biktima.

Gibutyag ni Dacallos sa imbestigador sa Talamban Police Station nga nabunalan niya ang bata apan sa tiil lang kini naigo ug wala siya masayod nganong naabot sa lawas ang bun-og niini.

Mao usab ang pamahayag sa inahan sa biktima tungod kay diha matud pa kini sa dihang gikasab-an sa iyang kapuyo ang iyang anak.

Apan ang mga silingan niini mibutyag matud pa nga kanunay kulatahon sa lalaki ang bata nga maoy hinungdan nga dili na kini morespeto sa ama-ama. /IBM (BANATNEWS)