Bata gikulata sa ‘adik’ nga ama-ama patay

CEBU, Philippines — Patay ang 9-anyos nga lalaki human gikulata sa iyang gituohan nga adik nga ama-ama niadtong Lunes sa hapon sa Sitio Kumon, Barangay Bacayan, Dakbayan sa Sugbo.

Giila ang biktima nga si Roger Aldolfo nga nagpuyo sa maong lugar.

Matud ni Police Captain Jonathan Bethoveen Taneo nga nakadawat sila og report kalabot sa usa ka bata nga gidala sa tambalanan human gikulata sa ama-ama niadtong Lunes.

Apan niadtong Martes sa kaadlawon nakadawat nalang sila og impormasyon nga namatay na ang bata human gumikan sa naangkon nga mga bun-og sa lain-laing parte sa lawas.

Sa follow-up operation naabtan nalang sa kapolisan ang ama-ama nga si Rodante Dacallos nga paingon na unta mosibat ug diha na nila naabtan sa Barangay Mambaling.

Unang nadakpan ang kapuyo niini nga si Rosita Adolfo kinsa inahan sa biktima.

Gibutayag ni Taneo nga lakip nga gidakop nila ang inahan tungod kay gibakakan niya ang kapolisan sa nahimutangan ni Dacallos tungod iya kini gilabanan.

Sa pagsusi sa kapolisan ilang nasayran nga niadtong 6-anyos pa lang ang bata naandan na kini nga kulatahon ni Dacallos ilabi na kung moinit ang ulo niini ug nakagamit sa ilegal nga drugas.

Gani gibutyag sab sa mga saksi nga mismo ang inahan sa biktima ang konsintedor sab sa binuhatan sa iyang kapuyo sa pagpangulata sa bata.

Samtang atol sa pagkahitabo adunay gisugo si Dacallos sa bata apan tungod kay wala nisugot ang bata dali nga nikuha og bunal ang ama-ama ug gipusposan ang biktima sa nagkalain-laing parte sa lawas hinungdan nga nakuyapan.

Kasong homicide ang atubangon ni Dacallos ug kasong obstruction of justice ang isang-at nga kaso batok kang Adolfo. /GMR (BANATNEWS)