Duha naglibud-suroy nasakmitan og shabu

CEBU, Philippines — Gitanggong sa detention cell sa Presinto 2 sa Mandaue City Police Office (MCPO) ang duha ka lalaki nga nasigpatan nga naglibud-suroy alas 8 pasado ang takna sa gabii sa Barangay Subangdaku.

Si Police Major Marvin Figarido, hepe sa Presinto 2 sa MCPO, niila sa duha nga ilang dinakpan nga sila si Frank Anthony Cañete, 20-anyos ug Raymond Gonzales, 20-anyos, pulos nagpuyo sa maong dapit.

Matud ni Figarido nga dihang gisita ang duha sa kapolisan ug gipangitaan sa ilang quarantine pass wala kini nakapakita hinungdan nga gidakop.

Dihang gihimo ang pagrekisa sa kalawasan sa duha ka dinakpan isip maoy naandan nga pagahimoon, maoy nadiskubrehan ang gidala nilang pakete nga shabu.

Si Cañete ang nakuhaan og duha ka pakete sa gituohang shabu ug usa sab ka pakete ang nakuha gikan kang Gonzales.

Ang duha ka dinakpan ang pasakaan og kaso sa kalapasan sa curfew, enhanced community quarantine (ECQ) ug ingon man sa ilang paghupot og shabu. /GMR (BANATNEWS)