Number coding nakapamenus sa sakyanan

CEBU, Philippines — Milampos ang Dakbayan sa Sugbo sa unang adlaw sa pagpatuman sa number coding scheme sa mga motorista diha sa kadalanan sa dakbayan nga personal nga giobserbahan ni Mayor Edgardo Labella ug Pangulo sa Cebu City Police Office Col. Josefino Ligan.

Ang mayor mipagawas og Executive Order 70 An Order Establishing A Number Coding Scheme to Regulate Vehicles in Cebu City During the Period of Enhanced Community Quarantine human naobserbahan nga bisan sa gipatumang ECQ daghan gihapong mga sakyanan ang nagdagan sa kadalanan.

Matud pa ni Labella, base sa iyang assessment epektibo ang gipahigayon nga number coding, epektibo kini tungod kay nimingaw ang dakbayan.

Sumala pa sa mayor ang exemption nga gihatag niya ngadto sa mga medical practitioners, front liners ug uban pang nalatid na sa mga unang EOs magpabilin malakip usab kini ngadto sa ilang mga sakyanan kay extended man sa ilang gisakyan ang ilang exemptions. Sumala pa ni Labella, padayon pa ilang pagsusi ug pag evaluate kung gikinahanglang lugwayan ang ECQ sa siyudad apan gihangyo niya ang katawhan magpabilin lang diha sulod sa ilang panimalay.

Border control

Sa pikas bahin, hingpit nang napatuman ang estrikto nga border control sa Probinsya sa Sugbo karong adlawa kon diin adunay mga empleyadong wala na maapil sa exemptions nga makasulod gawas sa mga utlanan sa lalawigan.

Sa Executive Order No. 5-Q ni Gobernador Gwendolyn Garia gi-revoke niini ang iyang unang EO No. 5-O-1 nga diin apil sa mga exempted ang mga empleyado sa mga pili nga establismento sama sa mga empleyado sa grocery stores,  supermarkets, drugstores ug parmasya, restaurants, bakeries, fast food chains, ug pizza chains. Sa bag-ong EO No. 5-Q penetsahan Abril 17, 2020, gitangtang na ang maong mga empleyado apil na ang construction workers sa mga exempted.

Ang bag-ong EO epektibo karong adlawa, ang mga empleyadong gikonsiderar sa probinsya nga adunay "essential functions" sama sa medical personnel, emergency response, accredited media personnel ug ubang frontliners maoy exempted. Ang kausaban resulta sa tigom sa mga mayor sa tibuok lalawigan niadtong Abril 17 human sa pagsaka sa kaso sa coronavirus disease (COVID-19) sa Dakbayan sa Sugbo.

Sumala pa sa gobernador, ang mga kompanya sa mga trabahanteng natangtang sa exemptions mao nay mangita og kapuy-an sa ilang mga kawani sa sulod sa siyudad aron di na sila kinahanglang manguli sa ilang mga lungsod kada adlaw. /IBM (BANATNEWS)