Pagsul-ob og facemask mandatory na sa Liloan ug Danao
CEBU, Philippines — Ang Lungsod sa Liloan ug ang Dakbayan sa Danao pareho kining niluwat og kamandoan sa mandatory nga pagsul-ob og facemask.
Sa Executive Order No. 2020-08 ni Mayor Christina Frasco nagmando nga tanang mga tawo sa ilang lungsod kinahanglang magsul-ob og mask sa paggawas sa ilang balay, opisina o trabahoan ug ubang lugar sulod sa Lungsod sa Liloan.
"The wearing of mask shall be mandatory in all public places and establishments, and in all transportation. All private and public establishments shall refuse entry to anyone not wearing a facemask", tipik sa EO ni Frasco.
Ug tungod sa kanihit sa face mask mamahimong mogama og improvised nga mask, reusable, ug kadtong “do-it-yourself" nga mask nga motabon sa ilong ug baba aron makasiguro nga walay pagtakod sa sakit niining padayong hulga sa coronavirus disease.
Ang tanang establisamento kinahanglan kini nga mohatag og mask o Personal Protective Equipment (PPE) sa ilang mga empleyado. Susamang kamandoan sa Dakbayan sa Danao diin ang tanan kinahanglang magsul-ob og face mask o bisan unsa nga klase sa mask nga motabon sa baba ug ilong.
Sa Ordinance No. 2020-16-008 gi-required ang pag sul-ob og facemask sa pampubliko nga lugar ug "critical situation" atol sa period sa national health emergency tungod sa covid-19.
Ang dili motuman sa maong kamandoan adunay silot nga ipahamtang diin sa unang kalapasan mao ang pag-reprimand o pagpahimangno, sa ikaduhang kalapasan makabayad og multa nga P500.00 samtang sa ikatulo nga kalapasan mao ang pagbayad og P1,000 nga multa o pagkapriso sulod sa lima ka adlaw. /BDB (BANATNEWS)
- Latest