Ubang krimen wa pasagdi sa kapolisan
CEBU, Philippines — Bisan sa gipatuman nga hugot nga kampanya sa enhanced community quarantine, kapolisan wala gihapon mohunong paggukod sa mga malapason sa balaud lakip ang paghupot sa mga ilegal nga drugas ug armas.
Matud sa direktor sa Cebu City Police Office, Col. Josefino Ligan, nga sulod sa usa ka semana daghan sila og mga nasita nga walay quarantine pass, nakaisyu og 6,678 ka citation tickets, 482 ka temporary operators permit, 776 ang na-impound nga motor ug tricycle ug adunay 32 ang uban pang kalapasan.
Sumala pa ni Ligan nga aduna na usab silay napasakaan og kaso sa disobedience ug napahigayunan og counseling sa mga pahimangno nga anaa gihapon sa ECQ ug dili sila angay mogawas-gawas sa ilang panimalay.
Dugang pa ni Ligan nga nakasikop usab sila og 86 ka tawo may kalaubutan sa ilegal nga drugas ug nakasakmit og 378 gramos nga shabu nga mobalor og dul-an sa P2.5 milyones.
Ang kapolisan nakaibot sab og 3,000 ka marijuana nga mobalor og P1.7 milyones.
Nakasikop usab ang kapolisan og 72 ka tawo sa anti-illegal gambling ug upat ka tawo nga naghupot og ilegal nga drugas lakip ang pagkasakmit sa 17 ka armas. Gitug-an ni Ligan nga ang statistics nagpamatuod nga ang kapolisan hugot nga nipatuman sa anti-criminality campaign. /GMR (BANATNEWS)
- Latest
