Dengue nanghasi sab sa CV

CEBU, Philippines — Samtang nakatutok ang tanan sa gikalisangang coronavirus COVID-19, aduna pay mas nauna nang balatian nga sama gihapon kabangis makamatay nga padayon sab sa pagpamiktima sa katawhan ilabi na sa mga bata. Base sa talaan, niabot na og 28 ang patay sa sakit dengue sa tibuok Central Visayas sumala sa Department of Health  Central Visayas. Kining tanan natala sa unang tulo ka bulan karong tuiga.  Base sa datus nga gipagawas sa DOH-7 miabot sa 7, 698 ka kaso ang natala nga nataptan og dengue lukop rehiyon gikan sa bulan sa Enero hangtod Marso 2020.

“This is 9. 38% higher compared to the same period last year with 7, 038 cases,” sumala sa DOH.

Sa record sa Regional Epidemiology and Surveillance Unit (RESU -7), ang dakbayan sa Sugbo maoy adunay pinakadaghan nga kaso nga niabot sa 1, 108 diin lima ang patay; sunod ang Lapu-Lapu City 645 ka kaso; Mandaue City 344  ug usa ang patay; Talibon sa lalawigan sa Bohol 320 ang kaso ug dunay duha nga patay ug sa Dakbayan sa Carcar 283 ka kaso.

“Most of those affected were under 6 to 10 years age group,” sumala sa RESU.

Sama sa gihapon, ang kanunay nga pagpanglimpyo sa palibot ug pagsigurong walay mga napundong tubig nga maitlogan sa lamok mao lang ang epektibong panagang batok sa maong sakit. /IBM (BANATNEWS)