Isda sa pasil mabaligya na sa Mandaue

CEBU, Philippines — Nag-alayon ang Bureau of Fisheries and Aquatic Resources ug mother agency niini nga Department of Agriculture aron ang mga kuha sa kadagatan gikan sa Pasil Landing Center mahimo na kining mapalit sa mga residente gawas sa Dakbayan sa Sugbo.

Ang programa gitawag og “Kadiwa ni Ani at Kita” nga gitambayayungan sa DA ug BFAR aron pagtabang sa mga apektado nga local fish vendors nga mobaligya sa ilang mga produkto sa Dakbayan sa Mandaue.

Sa maong pamaagi ang mga fish vendors adunay maayo nga lugar aron makapamaligya sa ilang produkto.

Mga pinili nga fish vendors nga giila sa Cebu City Department of Veterinary Medicine and Fisheries ang adunay kahigayunan nga maka-display sa ilang produkto sa DA-7 regional office sa Barangay Estancia-Ibabao, Dakbayan sa Mandaue. Ang DA maoy nangulo sa Kadiwa ni Ani at Kita, usa kini ka food market nga bukas gikan sa Huwebes ngadto sa Biyernes alas 8 sa buntag hangtud sa alas 5 sa hapon.

Sugod karong semanaha ang BFAR-7 mo-deploy sa ilang reefer van aron mokarga sa mga fish products gikan sa Dakbayan sa Sugbo ngadto sa Dakbayan sa Mandaue.

Kung mahinumduman ang mga manindahay sa Pasil nangayo og tabang sa BFAR human minus na ang ilang tinda sa landing center ug wet market tungod sa kalisud sa mga fish traders, dealers ug customers nga makasulod sa siyudad aron mopalit og mga isda tungod sa hugot enhanced community quarantine may labot sa coronavirus disease 2019. /GMR (BANATNEWS)