Taga Naga patamnon para wagtang sa kalaay
CEBU, Philippines — Manghatag og libreng liso nga matanom ang kagamhanan sa Dakbayan sa Naga.
Kini maoy usa sa mga programa sa buhatan sa City Agriculturist aron mahimong productive ang adlaw sa Nagahanon nga nituman sa “stay at home” nga panawagan sa gobiyerno.
Apan ang ilang liso limitado lang hinungdan nga 50 ra gyud ka tawo ang makapahimulos una niini samtang nagpaabot pa sa laing mga liso.
Ang mahimong matanum mao ang liso sa talong, okra, batong, paliya, kalbasa, pipino, sili, kamatis ug pechay.
Si Mayor Kristine Vanessa Chiong padayon nga niawhag sa katawhan nga magpundo lang sa balay samtang nakigbatok pa sa coronavirus disease.
Ang maong programa maoy paagi nga mawagtang ang kalaay sa katawhan nga naa sa ilang pinuy-anan. Ang pamilya nga magtanom dili na sab kinahanglan nga mopalit pa sa ilang kan-on tungod kay ang bunga sa ilang gitanom sila man ang makakaon niini. /GMR (BANATNEWS)
- Latest