Dakpon ang di magdala og ECQ Pass

CEBU, Philippines — Gimandoan ni Cebu City Mayor Edgardo Labella sa Dakbayan sa Sugbo ang bag-ong hepe sa Cebu City Police Office Police Col. Josefino Ligan sa mas hugot nga pagpatuman sa executive order may kalabutan sa Enhanced Community Quarantine sa siyudad.

Kini tungod sa nahitabong paghugop sa mga mamalitay diha sa Carbon Public Market niadtong Semana Santa aron lang makapalit ug sagol sa binigniton.

Matud pa ni Labella, daghan ang nilapas sa social distancing, hinungdan kinahaglan pahugtan sa kapulisan ang pagpatuman sa lagda sa ECQ dili lang sa mga merkado kondili hasta sa mga barangay.

Gimando ni Labella nga susihon gyud kining mga tawong magsuroy-suroy sa dakbayan ug kung wala kini mga importante nga katuyoan angayan kini papaulion. Ang matag panimalay gihatagan lang og usa ka ECQ pass nga kinahanglang dad-on kun mogawas aron mamalit og pagkaon ug batakang panginahanglan.

Giawhag sab niya silang Konsehal Dave Tumulak ug Konsehal Raymond Garcia nga mo-sponsor og ordinansa nga magsilot og community service sa malapason sa ECQ.

Si Ligan sa iyang bahin mipasalig nga iyang seryuhon pagtuman ang kamandoan sa mayor. Matud niya kadtong walay ECQ Pass ilaha gyung sikupon.

Hinuon adunay uban nga exempted sama sa mga padayong nagtrabaho, media, delivery sa pagkaon, mga frontliners ug mga kawani sa gobiyerno.

Sa laing bahin adunay 27 ka mga polis gikan sa Mabolo Police Station nga gipakatap sa Sitio Zapatera sa Barangay Luz Dakbayan sa Sugbo nga gipaubos karon sa lockdown human dunay duha nila ka mga residente ang nagpositibo sa COVID-19 ug naka-home quarantine didto.

Si Ligan nag-inspeksyon sa maong lugar lakip sa balay diin nagpuyo ang maong mga nagpositibo sa maong sakit.

Nabantayan ni Ligan nga mismo ang mga residenti na maoy nagbuhat og lakang sa pagprotektar sa ilang kaugalingon nga dili matakdan.

Adunay unom ka pulis ang gibutang sa entrance ug exit points sa maong sitio ug aduna sab mga police nga magpatrolya sa sulod aron pagsigurong walay si bisan kinsang mogawas sa ilang panimalay. Sheriza Mae Uy/IBM (BANATNEWS)