Laing namaligya og thermal scanner gidakop
CEBU, Philippines — Nadakpan sa hiniusang entrapment operation sa City Intelligence Branch sa Lapu-Lapu City Police Office ug Philippine Air Force ang usa ka negosyante nga giingong nipaburot sa baligya nga mga thermal scanner.
Si Police Lieutenant Colonel Mark Gifter Sucalit, hepe sa CIB ug First Lieutenant Timhar Wahid, Director for Intelligence sa PAF, maoy nangulo sa operasyon nga gipahigayon sa BPI Tamiya sa Barangay Basak sa maong dakbayan alas 8 sa buntag niadtong niaging adlaw.
Giila ni Sucalit ang dinakpan nga si John Michael Monfero Abuton, 31, taga Block 1, Lot 7 CKL Homes, Barangay Agus sa maong dakbayan.
Nasakmit ang usa kabuok non-contact IR Thermometer nga maoy gipalit sa ilang police decoy, 11 ka units sa non-contact IR Thermometer, usa ka unit nga Asus cellularphone, 10 ka digital fiber thermometer, ug P5,00O nga marked money.
Ang nasakmit nga mga PPE gitugyan ngadto sa Food and Drug Administration (FDA) aron pagsuta kung genuine ba ang maong mga kahimanan batok coronavirus nga gibaligya sa kantidad nga P60,000.
Ang dinakpan gikatakdang pasakaan og kasong kalapasan sa Republic Act 7581 o Price Act nga giusab sa R.A. 10623, R.A. 9711 o ang FDA Act of 2009 ug R.A. 7394 o ang Consumer Act of the Philippines may kalambigitan sa Presidential Proclamation No 922. /GMR (BANATNEWS)
- Latest
