COVID+ sa sugbo nagpabilin sa 31

CEBU, Philippines — Nagnegatibo sa coronavirus disease (CoViD-19) ang 76 ka swabs nga gi-test kagahapong adlawa sa Vicente Sotto Memorial Medical Center Sub-National  Laboratory (VSMMC SNL).

Kini ang gibutyag ni Gob. Gwendolyn Garcia kinsa nipasabot nga anaa lang gihapon sa 31 ang natala nga kaso sa CoViD-19 sa tibuok Sugbo samtang moabot sa 49,407 ang Persons Under Monitoring (PUM) sa tibuok probinsiya.

Matud ni Garcia nga daghan ang PUMs tungod kay ang nga lungsod ug siyudad walay kompiyansa kun adunay moabot sa lugar gikan sa laing lugar kinsa ila pabalikon sa pag-quarantine.

Sa record sa Kapitolyo, adunay 11,173 ang nahuman na sa 14 ka adlaw nga quarantine; 262 ang adunay Influenza Like Illnesses (ILI) ug upat ang Severe Acute Respiratory Infection (SARI).

Sa mga provincial ug district hospitals, adunay pito ka SARI kinsa ang lima anaa sa tambalanan, usa ang gi-refer sa VSMMC ug usa ang nakagawas na.

Ang ILI usab nga anaa sa mga tambalanan sa probinsiya ang anaa sa 29 kabuok diin duha ang na-refer sa VSMMC ug ang 27 ang giabisohan na nga mag-home isolation.

Samtang anaa pa gihapon sa 36 ang natala nga kaso sa CoViD-19 sa tibuok Central Visayas base sa datus sa Department of Health niadtong Abril 7, 2020.

Apan gikan sa mga positibo nga kaso adunay bag-ong unom ang nag-negatibo na sa CoViD-19.

Sa datus sa DOH nadugangan og usa ka kaso ang Dakbayan sa Sugbo nga karon aduna nay 23 nga positibo nga maoy labing daghan sa Rehiyon 7 samtang walay nadugang sa walo nga namatay. /GMR (BANATNEWS)