Polis nga na-entrap pasakaan na og kaso

CEBU, Philippines — Pormal na nga pasakaan og kasong kriminal ug adminstratiba ang usa ka polis nga nasikop atol sa gipahigayong joint operation sa Integrity Monitoring Enforcement Group (IMEG) Visayas Field Unit ug Police Regional Office 7 diha sa Barangay Tejero, Dakbayan sa Sugbo.

Matud ni Police Brigadier General Albert Ferro, direktor sa PRO-7 nga nadismaya usab siya sa gibuhat ni Police Corporal Wenefredo Olongaylo og P10 mil nga balor sa aircondition ngadto sa igsuon sa ilang dinakpan aron maareglo ang kaso sa suspek.

Si Ferro nipadayag nga nadismaya siya tungod kay nagpadayon gihapon ang ilegal nga binuhatan sa pipila ka polis nga nalambigit sa ilegal nga drugas. Dili kini maoy unang higayon nga adunay polis gikan sa Waterfront Police Station ang gidakop sa IMEG.

Sayo pa, usa ka polis sa Waterfront Police Station ang nasikop usab tungod sa giingong pagpangawat og armas diha sa ilang sa safe volt sa mga armas.

Dugang ni Ferro nga sa unang semana sa iyang paglikod sa posisyon aduna silay gilagdaan nga dili modawat o mangayo og bisag unsa nga payola o kwarta gikan sa nagkalainlaing matang sa ilegal nga kalihukan. /BDB (BANATNEWS)