Apura: Dili karon panahon sa reklamo; Form sa SAC gipaimprinta ug gibaligya?

CEBU, Philippines — Mga15 ka barangay sa Dakbayan sa Carcar ang nagdungan sa pag-apod-apod og tabang ngadto sa ilang mga konstituwente nga apektado sa Enhanced Community Quarantine tungod sa coronavirus disease.

Sa Barangay Tuyom nga gipangulohan ni Kapitan Rogelio Babao Jr. nag-apod-apod sila og tag tulo ka kilo nga bugas. Matud ni Konsehal Manolito Languido, ang budget sa ilang pagpamalit ug 100 ka sako nga bugas gikan sa Quick Response Fund sulod sa upat ka tuig gikan sa 2016 ngadto sa 2019. Gibutyag ni Languido nga 1,500 ka panimalay ang ilang gipanghatagan sa tag tulo ka kilo nga bugas.

Samtang ang kapitan sa Barangay Valladolid ug kasamtangan nga ABC President Anthony John Apura sa iyang social media page niapod-apod og tag lima ka kilo nga bugas, duha ka sardinas ug duha ka noodles, usa ka buhi nga manok alang usab sa mga kabus.

Giklaro ni Apura sa wala makadawat og manok angay sila magpasalamat tungod kay nagpasabot kini nga wala kaayo sila maglisod sa kinabuhi.

Giawhag ni Apura ang katawhan nga mag-amping ug gipahinumduman usab nga panahon karon sa pagtinabangay ug dili panahon sa mga reklamo.

Sa laing bahin, ang mga kawani   sa City  Social  Welfare  and Development Office (CSWDO) sa Dakbayan sa Lapu-Lapu ang mobisita  sa kabalayan alang  sa pagpang-apod-apod ug pagtabang ug maka-fill up sa Social Amelioration Card alang niadtong kwalipikado nga beneficiary niini.

Kini ang gipahibalo ni  Lau-Lapu  City  Mayor  Junard  Ahong  Chan pinaagi sa iyang live video sa niaging gabii.

Ang 12,000 cards libre kining ipanghatag ngadto sa mga hingtungdan nga benepisaryo sa Social Amelioration Program gikan sa nasudnon kagamhanan.

Gibutyag ni Chan nga nakadawat siya og taho nga adunay mga badlongon ang ni-download sa form ug gipaimprinta ug gipamaligya og P30 ang matag usa. Naglakip sa mga makadawat sa maong hinabang kadtong mga senior citizen, PWDs, mabdos, solo parents, walay pinuy-anan, walay klarong income nga pamilya ug mga katabang. Romeo T.  Limpangog/BDB (BANATNEWS)