MCWD nipasiugda og mobile water supply

CEBU, Philippines — Mga 27 ka sakyanan nga adunay tangke sa tubig o MCWD Mobile Water Supply ang nagtapok diha sa Plaza Sugbo atubangan sa Cebu City Hall.

Matud ni Atty. Jose Daluz III, chairman sa Metropolitan Cebu Water District nga patubig project kini sa MCWD ilabi na karon nga summer ug nag-atubang usab og krisis gumikan sa pagkuyanap sa coronavirus disease (covid-19).

Ang MCWD moserbisyo sa mga lugar nga walay tubig diin ang buhaton manawag lang sa ilang hotline number aron maadtoan ug mahatagan og tubig.

Na-identify na nila ang mga lugar nga walay tubig og giadto nila kini sama sa Bo. Luz, Kamputhaw, B. Rodriguez, Inayawan White Road, Pardo, Ramos Public Market, T. Padilla, M.J Cuenco, Lahug Barangay Hall, San Roque, Bontores, Sandayong, Sambag 1 Barangay Hall ug uban pa.

Kagahapon gisugdan ang water mobile supply diin molanat kini og duha ka buwan.

Samtang si Edgar Ortega, pangulo sa operations nipasabot sa mechanics sa paghatag og tubig diin una makig-alayon sila sa barangay tungod kay ang mga barangay ang nasayod sa panginahanglanon sa ilang molupyo.

Gawas sa 27 ka sakyanan aduna pay umaabot nga walo ug kon makita nila nga kulang gihapon mo-hire sila og lain. /BDB (BANATNEWS)