Tumulak niawhag sa pag-umol og Sitio Peace Auxiliary

CEBU, Philippines — Gihangyo ni Konsehal Dave Tumulak ang opisyales sa mga barangay sa pag-umol og Sitio Peace Auxiliary nga gilangkuban sa mga residente sa lugar.

Kadtong mga lalaki nga andam ug gustong motabang sa pagbantay sa ilang tagsa-tagsa ka sitio gumikan kay gikinahanglan ang ilang suporta sa kapolisan ingon man sa barangay ang angayang isakop niini.

Matud ni Tumulak nga adunay pagkuwang diha sa barangay hinungdan nga gidasig niini ang mga kalalakin-an nga mo umol og Sitio Peace Auxiliary.

Mananghid lang sa opisyales sa barangay ug kinahanglang adunay supervision sa hepe sa kapolisan sa lugar diin nahisakop. Ang trabaho sa maong Sitio Peace Auxiliary mao ang pag-roving sa ilang lugar, puli-puli lang ug naay oras nga sundon tungod kay sila man ang nasayod kon kinsa kadtong mosulod ug mogawas sa ilang lugar.

Gihulagway ni Tumulak nga ang maong Sitio Peace Auxiliary makatabang usab kini sa pagpugong sa krimen sama sa kawat ug uban pa tungod kay sila man mismo ang magbantay sa ilang komunidad.

Matud usab ni Tumulak nga gidasig niya ang mga sibilyan sa pagtabang sa pagmentinar sa kahusay ug kalinaw sa komunidor. Ang Sitio Peace Auxiliary  makatabang usab kini sa pag-monitor sa ilang mga silingan kong adunay gipamati sa panglawas aron ma-report dayon ngadto sa ilang barangay. Dugang ni Tumulak nga bisan og magtapok ang grupo kinahanglang motuman gihapon sa social distancing ug tumong usab niini mao ang pagbantay sa ilang Sitio nga walay makagawas ug makasulod nga wala sila makaila. /BDB (BANATNEWS)