Duha ka PUMs gipatay

CEBU, Philippines — Duha ka mga persons under monitoring (PUMs) ang gipaulanan og bala ug nangamatay sa bukirong bahin sa Barangay Alambijud sa Lungsod sa Argao niadtong  Huwebes sa gabii.

Ang nakalas naila nga sila si Renato Evangelista, taga Sitio Latasan sa Barangay Labogon sa Mandaue City ug Dexter Ronamo, taga Loboc sa Bohol ug puros temporaryong nagpuyo sa maong lugar

Samtang ang mamumuno giingong nag-inusara ug nagsul-ob og ski mask ug naglakaw lang sa pagikyas human sa krimen.

Pagabot sa kapolisan diha sa crime scene nagligdas na ang mga biktima sa yuta nga naligo sa ilang kaugalingon nga dugo ug wa nay kinabuhi.

Matud pa ni Police Corporal Ariel Conde, Desk Officer sa Argao Police Station, nag estambay ang duha sa gawas sa balay sa iyaan ni Ronamo sa dihang niabot ang wala mailhing lalaki  ug diretso silang girakrakan nini gamit ang gituohang M16 Armalite rifle ug pagkahuman daling nilakaw palayo.

Ang mga biktima nakaangkon og mga samad nga pinusilan sa nagkadaiyang parte sa kalawasan nga maoy naingnan sa ilang hinanali nga kamatayon.

Sumala pa ni Conde, dili mominos sa unom ka mga kabhang sa m16 ang nasakmit sa crime scene.

Dugang pa ni Conde, base sa inisyal nga kasayuran nakuha sa ilang imbestigador giingong drug surrenderee si Ronamo.

Ang director sa Cebu Provincial Police Office (CPPO) mipahibalo nga duna na silay gikonsiderar nga persons of interest sa maong pagpatay.

Si Police Colonel Rhoderick Mariano miingon nga ang mga tawong ilang gidudahan nakabikil sa biktima ug kini maoy ilang gitan-aw nga motibo sa pagpatay kanila.

Dugang pa ni Mariano nga gikatakda nga ipatawag sa Argao Police Station ang duha ka person of interest aron ipaubos og imbestigasyon.

Hinuon wala pa kaayo gibutyag sa kapolisan ang background sa mga person of interest apan possibli nga kaila na kini sa mga biktima.

“Baka personal grudge ang tinitingnan ng chief of police kase bakit sa among duon sa limang tao bakit silang dalawa lang yung binaril bakit hindi ‘yung mga kasamahan,” matud pa ni Mariano.

Gibutyag sab ni Mariano nga ang mga nangamatay gikonsiderar nga mga persons under monitoring tungod kay gikan sila sa dakbayan sa Mandaue nga adunay nagpositibo sa corona virus.

Apan wala magpasabot nga natakdan na ang duha maong sakit. Giingong nagbakasyon ang duha sa maong lungsod human gipaubos sa enhanced community quarantine ang tibuok isla sa Sugbo.

Samtang gimandoan sab sa director sa Police Regional Office 7, Police Brigadier General Albert Ignatius Ferro ang Criminal Investigation and Detection Group 7 nga moabag sa imbestigasyon sa pagkamatay sa duha didto sa lungsod sa Argao.  /IBM (BANATNEWS)