Kapitan sa Buhisan naleksyon kabahin sa social distancing

CEBU, Philippines — Nangayo og dispensa si Buhisan Barangay Kapitan Gremar Barete gumikan sa kasamok sa pagpangapod-apod sa hinabang niadtong Miyerkules diin wala na nasunod ang social distancing.

Giangkon ni Barete nga wala matarung pagdala sa iyang mga volunteers ug tanod ang distribution apan kini niasoy nga dunay miscommunication tungod kay kadtong ubang sitio nga dili pa ilang schedule ang nangabot.

Niadtong Miyerkules lima ka sitio ang nahatagan og hinabang nga mao ang Proper, Langob, Panpanan, Kawayan ug Puso diin didto naghuot ang mga tawo.

Si Barete niasoy nga sa wala pa nagsugod ang distribution adunay briefing sama sa social distancing.

“Ako mismo gasige na gyud ko og man during sa distribution, ako na gyud gi-monitor, naa pud ang PNP sige pud og monitor nagpatabang na gyud ta kay karong panahona ang gihimo na pud namo ganina coordination meeting mi before implementation per eskina na dili na per sitio,” matud ni Barete.

Si Mayor Edgardo Labella niawhag sa barangay kapitan sa pagpatuman gyud sa social distancing. /GMR (BANATNEWS)