Gibadlong sa polis, nisukol patay

CEBU, Philippines — Patay ang usa ka construction worker nga napusilan sa polis nga nitubag sa alarma sa pagpanghagis sa iyang sakop sa pamilya sa Sitio Kamaisan, Barangay Tulo-Tulo, Lungsod sa Consolacion alas 9 pasado niadtong Martes sa gabii.

Si Police Major Vermino Noserale, hepe sa Consolacion Police Station, niila sa namatay nga si Jaykee Semblante Nique, 28-anyos, nga nagpuyo sa maong dapit.

Matud ni Noserale nga nangayo og panabang sa kapolisan ang pamilya sa namatay tungod sa pagpanghulga ngadto kanila nga pamusilon ang iyang igsoon ug amahan.

Sa ilang pakisusi nga gihimo nga unang higayon nga nag-away ang maong pamilya batok sa namatay nga hubog niadtong higayona.

“Nanawag nga magparesponde og pulis kay naay nanghagis ug nagpabuto og pusil,” nagkanayon si Police Staff Sergeant Rexter Armenion nga maoy desk officer sa Consolacion Police Station.

Matud ni Armenion nga unang gipusil sa namatay ang igsoong babaye niini nga si Daisy Semblante Nique, 31-anyos, apan wala naigo ug gisunod sa pagtion sa gidalang armas ang amahan nga si Teodolo Nique, 59-anyos.

Dihang nahidangat si Police Staff Sergeant Julios Patac nga maoy nitubag sa maong alarma, nisulay unta kini sa pagpakalma sa maong kagubot.

Wala mopatuo ang suspek ug namusil kini sa polis nga maoy hinungdan sa pagbawos nga nakaingon sa iyang kamatayon.

Sa nasayran sa kapolisan nga ang namatay ang giingong tiggamitan og ilegal nga drugas. /GMR (BANATNEWS)