Nagpakopya sa ECQ pass gidakop

CEBU, Philippines — Usa ka babayeng tindera sa Carbon Public Market ang gidakop sa Waterfront Police Station niadtong Lunes sa gabii human gipasanginlang nag- reproduce og mga Enhanced Community Quarantine (ECQ) Pass Lunes sa gabii.

Giila ang dinakpan nga si Maria Rowena Avila-Sarsalejo, 38, taga Barangay Santo Niño sa Dakbayan sa Sugbo.

Matud ni Waterfront Police Station chief Police Captain Miles Damoslog nga giingon gidakop si Sarsalejo human nga nasakpang nag photocopy sa usa ka ECQ pass.

Sumala pang Damoslog nangrason si Sarsalejo nga wala kini intensyong ibaligya o gamiton sa illegal ang maong pass kondili pang backup lamang kini.

Gipasabot ni Damoslog nga bisan pa sa depensa sa dinakapan dili gihapon kini mamahimo tungod ang orihinal nga pass adunay dry seal sa kagamhanan ug aduna kini control number nga dili mamahimong ma doble.

Tungod niini klaro ug tataw ang mando ni Cebu City Mayor Edgardo Labella sa iyang Executive Order nga dili pwedeng pakopyahan ni bisan kinsa ang maong pass.

Ang babaye kasohan og kalapasan sa Article 172 sa Revised Penal Code in relation to section 7 kun unauthorized reproduction of ECQ pass ubos sa EO 65 nga giluwatan ni Labella.

Gawas niini gibutyag sab ni Damoslog nga aduna pay laing mga personalidad nga ilang gi-monitor nga nagbuhat sab niini.

Backup

Matud ni Cebu City Administrator Atty. Floro Casas nga si Mayor Edgardo Labella mimando na sa kapulisan nga ipatuman gyud ang balaod paggukod niadtong mga mapahimuslanon. Ang masakpan embarguhan niini ug dili na hatagan og usab ug pasakaan og kaso.

“Convenient kaayo na siya nga i-excuse dili man na siya mabalaka kay atoang back up ana kung mawala imong pass mao bitaw when you have your pass ato sad gi offer nga i-register nimo imohang pass online so that magamit na nimo imong pass kung mawala siya naa sad kay back up sa imohang phone dili kay imong i-photocopy.  In fact kato sila kung back up lang imong tuyo nganong tag tulo man gyud ka buok back up ilang kinahanglanon?” dugang ni Casas.

Ang tumong sa pag-isyu sa pass aron malimitahan ang mga tawo nga naa sa dalan nga makatabang aron malimitahan ang pagkatap sa COVID19.

Ang genuine nga ECQ baga ang papel sa card nga giisyu sa siyudad. Upat kini ka klase nga full- colors. Green sa mga residente, pula sa kawani ug opisyales sa gobiyerno, puti sa responders ug frontliners ug blue sa di mga residente sa siyudad.

Talisay City

Ang kapolisan sa Dakbayan sa Talisay mipasidaan niadtong mga tawong mamaligya sa Quarantine Pass.

Si Police Major Gerard Ace Pelare, pangu sa Talisay City Police Station namahayag nga dili tiaw ang sitwasyon karon.

Iyang giawhag ang katawhan sa pag-report dayon sa ilang buhatan kun adunay mamatikdan nga nagbuhat niini aron madakop diha-diha dayon.

Dugang pa niya nga walay luna ang pamintaha karong panahona tungod kay dili tiaw ang nasinati sa tanan. Decemay Padilla, Alicia Ivy L. Chua, Gabriel Bonjoc/IBM (BANATNEWS)