P2.8 milyones balor sa mga marijuana na nalarot

CEBU, Philippines — Nikabat ngadto sa P2.8 milyones ang balor sa marijuana nga nalarot ug lima ang nasikop sa gipahigayon nga operasyon sa 703rd Manuever Company sa Regional Mobile Force Battalion kagahapon sa buntag diha sa Barangay Gen. Climaco, Dakbayan sa Toledo.

Ang mga nasikop mao sila si Jerlito Sedavia, Michael Candilada, Benjie Candilada, Isidro Canaliso ug Harry Macapaz  nga gikonsiderar nga wanted person.

Gipagulohan ang maong pagpangalarot sa marijuana ni Police Captain Emmanuel Rabaya, hepe sa 703rd MC sa RMFB.

Matud ni Rabaya nga atol sa operasyon ilang naabtan ang  mga suspetsado nga nag-atiman sa mga tinanom nga marijuana.

Giingong ang mga suspetsado nagtuo nga ang marijuana tambal batok sa covid-19 apan giingong usahay pabayloan usab kini og shabu.

Nikabat sa 7,000 ka punoan sa marijuana ang nalarot sa kapolisan nga nibalor tanan ngadto sa P2.8 milyones. /BDB (BANATNEWS)