Mga sugarol ug durugista nasikop
CEBU, Philippines — Nagkatibulaag sa pagpanagan ang grupo sa mga sugarol diha sa tigbakayan atol sa pagpangronda sa kapolisan diha sa Barangay Bangbang, Lungsod sa Cordova niadtong Domingo sa hapon.
Nasikop sa maong operasyon ang tulo ka giingong niapil sa tigbakay lakip na niini ang senior citizen nga nagpangedaron og 72-anyos. Ang maong grupo sa mga lalaki kinsa nakamatikod sa kalit nga pag-abot sa mga polis ang nagkatibulaag og panagan apan ang nahisgutang tulo nagunitan kini sa mga polis. Nasakmit usab sa mga polis ang duha ka manok hiniktan nga tinauran na og tari laing upat ka manok igtatari nga nabiyaan ug ingon man ang P2,000 nga pusta nga nahibilin atol sa pagdinaganay.
Ang tulo gitanggong karon sa detention cell sa Cordova Police Station ug gikatakdang mag-atubang og tukmang kaso sa nahimo nilang kalapasan.
Samtang nasikop usab sa City Intelligence Branch (CIB) sa Lapu-Lapu City Police Office ang pusher og shabu diha sa Barangay Bankal sa maong dakbayan.
Ang nasikop mao si Lionel Aying Ugsang, 36-anyos, nagpuyo usab sa maong dapit kinsa nasakmitan og duha ka dakong pakete nga shabu nga nikabat ngadto sa P68,000 ang kantidad, P5,000 nga boodle money ug P300 nga gituohang halin niini.
Sa laing bahin, usa ka 36-anyos nga ginang ang nasikop sa Regional Drug Enforcement Unit, atol sa gihimo nga anti-illegal drugas operation diha sa Barangay Kamagayan, Dakbayan sa Sugbo.
Ang nasikop mao si Mary Flor Bugaren, residente sa maong lugar ug giingong negosyante online.
Nasakmit gikan kang Bugaren ang mga pinutos nga ginadiling drugas nga nikabat tanan ngadto sa P272 ang kantidad ug buy bust money. Rowena D. Capistrano/BDB (BANATNEWS)
- Latest