Talisay may COVID positive na
CEBU, Philippines — Nagguol si Talisay City Mayor Gerald Anthony “Samsam” Gullas Jr. human usa ka taga dakbayan ang nagpositibo sa Coronavirus Disease (COVID-19).
Matud ni Gullas nga ang rehiyonal nga direktor sa Department of Health 7 mismo ang nipahibawo kaniya.
Niadto pang Marso 25 na-dmit sa tambalanan ang pasyente ug wala kini nalakip sa gipaubos sa Person Under Monitoring (PUM) ug Person Under Investigation (PUI) kay wala man kini ni-report sa bisan unsa nga ahensya sa gobiyerno.
Matud ni Gullas nga naghimo na sila og contact tracing o pagsuta kinsa ang mga tawo nga gipakigkitaan sa maong pasyente.
Gikordon na ang pinuy-anan sa maong pasyente samtang gihimo ang pag-disinfect niini.
Subling giawhag ni Gullas ang katawhan nga anha lang gyud sa ilang pinuy-anan samtang padayon nga pakigbatokan ang virus.
“This is a tough time for all us, especially for the people of Talisay City. But we can conquer this if we remain prayerful, strictly observe health precautions and avoid leaving our houses unless to buy food and basic necessities. Please protect us Snr. Sto Niño and Sta. Theresa de Avila,” sigun pa ni Gullas.
Samtang niabot sa 600 ka facemasks ang gihatag sa mga piniriso sa Talisay City Jail ngadto sa kagamhanan sa dakbayan kagahapon sa buntag. Si Senior Insp. Cresyrel Awe, warden sa TCJ, niingon nga gihimo sa mga binilanggo ang facemasks aron makatabang sa pagprotehir sa katawhan sa mga sakit ilabi na sa COVID-19.
Matud pa ni Awe nga libre kini nga gihatag sa mga piniriso samtang ang lokal nga kagamhanan nagpasalamat sa gihimo sa TCJ ug sila na ang moapod-apod niini ngadto sa kabarangayan aron magamit sa mga frontliners o sa mga yanong indibidwal. /GMR (BANATNEWS)
- Latest
